Sylwebydd radio “yn amau a fydd Radio Cymru efo ni am lawer hirach”

Diweddarwyd  

Radio Cymru 2

Mae sylwebydd radio a theledu wedi beirniadu Radio Cymru’n hallt, gan gwestiynu a fydd yr orsaf yn dal i fynd am lawer hirach.

Ar ei flog Shitclic mae Dylan Wyn Williams – a fu’n golofnydd yn adolygu teledu a radio i gylchgrawn Golwg a phapur newydd Y Cymro – yn tynnu sylw at ffigurau gwrando’r orsaf ac yn dweud eu bod yn “gwneud i rywun amau a fydd Radio Cymru hefo ni am lawer hirach”.

Mae hefyd yn beirniadu Radio Cymru 2, chwaer orsaf ddigidol BBC Radio Cymru, a’r “un hen rhai” sydd ynghlwm â hi – mae yna lun o’r cyflwynwyr Caryl Parry Jones a Dafydd Du ynghyd â’r sylw yma ar ei flog.

Daeth i’r amlwg fis diwethaf bod 102,000 o bobol wedi gwrando ar Radio Cymru yn ystod y tri mis gynt – y nifer isaf ers yr 101,000 a gofnodwyd yn 2016.

Erbyn hyn, mae’r ffigyrau ar gyfer Radio Cymru hefyd yn cynnwys y nifer sy’n gwrando ar Radio Cymru 2. Mae Dylan Wyn Williams yn awgrymu bod neb yn gwrando ar yr ail orsaf.

“Piso ar jips”

Mater arall sy’n cael sylw’r adolygwr yw penderfyniad Radio Cymru i beidio â darlledu’n fyw o Ŵyl Gerdd Dant 2019 nac ychwaith o eisteddfod genedlaethol y Clwb Ffermwyr Ifanc (CFfI).

“Dw i’n ymwybodol nad ydi corau Laura Ashley-aidd â geriach Cwt Tatws, na ffarmwrs mewn ffrogiau (Maggi Noggi’s Drag Race?) at ddant pawb,” meddai ar ei flog, “ond mae penderfyniad Radio Cymru i beidio â darlledu’n fyw o’r ŵyl gerdd dant nac Eisteddfod CFfI Cymru eleni yn od ar y naw.”

Er bod “gemau rhyngwladol yr hydref yn boen i drefnwyr amserlenni” fel arfer, meddai, mae’n dweud bod “dim esgus” tros beidio â darlledu yn fyw eleni.

“Sôn am biso ar jips y gynulleidfa draddodiadol,” meddai wedyn. “Nais won, Radio Cymru.”

Mae golwg360 wedi gofyn i’r BBC am ymateb.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones