Maes B 2018: cadarnhad bod adeilad Doctor Who dan ystyriaeth

Diweddarwyd  

Adeilad y ‘Doctor Who Experience’

Llun: golwg360

Mae Cyngor Dinas Caerdydd wedi cadarnhau eu bod wrthi’n trafod â’r Eisteddfod Genedlaethol ynglŷn â’r posibiliad o gynnal gigs Maes B eleni yn adeilad Doctor Who yn y Bae.

Ers misoedd, mae sïon wedi bod ar led y gallai gigs pobol ifanc y brifwyl gael eu cynnal yno – fe adroddodd golwg360 ar y mater ym mis Chwefror.

Ond, yn ogystal â chadarnhau’r trafodaethau â’r Eisteddfod Genedlaethol, mae’r Cyngor wedi cadarnhau bod opsiynau eraill yn cael eu hystyried ar gyfer y safle.

Ac mae hyn yn sicr o ddwysau pryderon y gallai gobeithion yr Eisteddfod am y safle gael eu tanseilio.

Opsiynau

Llywodraeth Cymru sy’n berchen y safle a Chyngor Caerdydd sy’n berchen yr adeilad ei hun – nhw hefyd wnaeth ariannu adeiladu’r safle.

Ond, os ydi Cyngor Dinas Caerdydd am barhau i rentu’r safle ar brydles gan Lywodraeth Cymru, mae disgwyl iddyn nhw ddod o hyd i’r tenantiaid diwethaf, BBC Worldwide.

Mewn neges at golwg360 mae llefarydd ar ran y Cyngor wedi cadarnhau eu bod yn “ymchwilio i nifer o opsiynau ar gyfer y safle”.

Mae’r awdurdod lleol yn gwrthod datgelu pwy sydd wedi dangos diddordeb yn y safle hyd yn hyn, ond maen nhw’n cadarnhau nad oes unrhyw fargen wedi’i tharo eto.

“Rydym yn gweithio â Llywodraeth Cymru ar gynlluniau ar gyfer yr adeilad, ond dyw’r mater ddim wedi dod i ben eto,” meddai llefarydd ar ran Llywodraeth Cymru.

Canolfan y Doctor Who Experience

Rhwng Gorffennaf 2012 a Medi 2017, roedd BBC Worldwide yn rhentu’r safle ar brydles oddi wrth Gyngor Caerdydd, a daeth y ganolfan yn gartref i arddangosfa’r gyfres deledu Doctor Who.

Daeth y trefniant yma i ben wedi pum mlynedd pan ddaeth y cytundeb i ben.

Fe wnaeth Cyngor Caerdydd wneud colled o £1.1m trwy brydlesu’r ganolfan i BBC Worldwide, gydag arian y trethdalwr yn mynd i wneud yn iawn am hyn.

Tu fewn i’r adeilad mae yna ardal agored fawr ‘aml bwrpas’, yn ogystal ag ardal swyddfeydd dau lawr.  

Cymru

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed