Cost tanau coedwigoedd yn codi i fwy na hanner miliwn

Diweddarwyd am  
Dylan Morgan

Mae cost y difrod i goedwigoedd sy’n cael eu rheoli  gan Cyfoeth Naturiol Cymru (CNC) wedi codi i fwy na £500,000.

Yn dilyn cyfres o danau gwyllt ar draws Cymru yn ystod yr wythnosau diwethaf mae swyddogion Cyfoeth Naturiol Cymru wedi bod yn defnyddio’r cyfryngau cymdeithasol er mwyn egluro’r dinistr a achoswyd i ardaloedd eang o goedwigoedd a bywyd gwyllt yng Nghymru.

Cafodd dros 120 hectar o dir ei ddifrodi mewn tan rhwng Aberystwyth a Machynlleth yr wythnos hon. Mae lle i gredu bod y tan ger Llyn Conach yng Ngheredigion wedi’i gynnau’n fwriadol.

Yn ôl Cyfoeth Naturiol Cymru mae tanau gwyllt hefyd wedi rhoi pwysau ychwanegol ar wasanaethau brys sydd wedi gorfod ymateb i’r tanau yn ystod y pandemig coronafeirws.

Yr ardaloedd sydd wedi cael eu heffeithio waethaf ydy Bangor, Afon Wen yn Nolgellau, Coedwig Afan, Gwaun Hepste ym Mhenderyn, Mynydd Cilfái yn Abertawe, Esgair Dafydd ger Llanwrtyd a Phlas Y Mynydd yng Ngheredigion.

“Colled ariannol sylweddol”

 Yn ôl James Roseblade, rheolwr coedwigaeth yn Ne Orllewin Cymru: “O ystyried yr argyfyngau hinsawdd a natur yr ydym i gyd yn eu hwynebu, tanau gwyllt yw’r peth olaf sydd ei angen ar dirwedd Cymru.

“Mae’r tanau wedi arwain at golled ariannol sylweddol o £500,000 i Gyfoeth Naturiol Cymru.

“Mae’r effaith ar natur a bywyd gwyllt, yn enwedig yr adeg hon o’r flwyddyn pan fo rhai adar yn nythu ar lawr, yn gwbl ddinistriol.”

“Perygl gwirioneddol”

Eglurodd Dylan Williams o Cyfoeth Naturiol Cymru, sy’n gweithio’n agos â’r gwasanaethau brys, fod un o’r tanau wedi ei achosi gan wreichionyn o dân gardd a achosodd iddo ymledu i’r goedwig.

“Cyn cynnau tân yn yr ardd, meddyliwch a yw’n hanfodol ai peidio. Gall pethau fynd allan o reolaeth mor hawdd,” meddai.

“Pan fydd tanau’n cael eu cynnau’n fwriadol, mae’r troseddwyr nid yn unig yn niweidio’r amgylchedd, maen nhw’n rhoi eu hunain, y gwasanaethau brys, a thrigolion lleol mewn perygl gwirioneddol.”

Gan gydweithio â’r gwasanaeth tân ac achub, yr heddlu a phartneriaid eraill mae ymgyrch Dawns y Glaw Cyfoeth Naturiol Cymru yn gobeithio codi ymwybyddiaeth o’r effaith gall tanau fel hyn achosi.

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn