Mae Donald Trump wedi dweud bod y cyfarfod rhyngddo â Vladimir Putin wedi cael “dechrau da iawn”.

Mi dreuliodd y ddau fwy na dwy awr yng nghwmni ei gilydd yn Helsinki, prifddinas y Ffindir, heddiw (dydd Llun, Gorffennaf 16).

Daw’r cyfarfod ddiwrnod ar ôl i Arlywydd yr Unol Daleithiau adael yr Alban, lle bu’n treulio’r penwythnos ar ôl cyfarfod â Phrif Weinidog Prydain, Theresa May, a’r Frenhines ddiwedd yr wythnos ddiwetha’.

Heddiw yw diwrnod cynta’r cyfarfod rhwng Donald Trump ac Arlywydd Rwsia, ac fe fydd y trafodaethau rhwng y ddau yn parhau yfory.

Protestiadau

Yn y cyfamser, mae nifer wedi bod yn protestio yn Helsinki wrth i’r ddau arweinydd ymweld â’r wlad.

Maen nhw’n protestio am amryw o faterion, gan gynnwys hawliau hoywon ac erthylu, yr amgylchedd, a’r rhyfel yn yr Wcráin.

Ddydd Sul, fe orymdeithiodd tua 1,500 o bobol drwy’r ddinas, gyda’r gobaith o dynnu sylw at eu materion.

Dywedodd trefnwyr un o’r protestiadau nad oedden nhw’n targedu Donald Trump na Vladimir Putin yn benodol, ond yn hytrach yn ceisio tynnu sylw at nifer o faterion rhyngwladol.