Sosialwyr asgell chwith yn ennill etholiad cyffredinol Albania

Mae’r blaid sosialaidd asgell chwith wedi ennill mwyafrif yn etholiad cyffredinol Albania.

Fe ddaw’r canlyniad wrth i’r wlad obeithio dechrau trafod ymuno â’r Undeb Ewropeaidd.

Gyda 95% o’r pleidleisiau wedi’u cyfri, mae plaid sosialaidd y Prif Weinidog, Edi Rama, wedi sicrhau tua 48% o’r rheiny, neu 74 o seddi yn y senedd o 140 o seddi.

Roedd y llywodraeth flaenorol yn glymblaid rhwng y Sosialwyr a’r Mudiad Sosialaidd Cynhwysol.

Fe enillodd plaid y Democratiaid 29% o’r bleidlais (43 sedd), a’r Mudiad Sosialaidd Cynhwysol (LSI) oedd yn drydydd gyda 19 o seddi. Roedd y tyrnowt yn 46.6%.

Fe enillodd Albania, cenedl o 2.9 miliwn o bobol, statws ymgeisydd i fod yn aelod o’r Undeb Ewropeaidd, yn 2014.