“50 sedd i’r SNP, ac mi nofia i’n noeth” – Ruth Davidson

 
Ruth Davidson yn annerch yn Senedd yr Alban

Ruth Davidson

Llun: Andrew Cowan / Senedd yr Alban

Mae Ruth Davidson yn addo nofio’n noethlymun yn Loch Ness pe bai’r SNP yn ennill 50 o seddi yn yr etholiad cyffredinol yfory (dydd Iau, Rhagfyr 12).

Ond mae cyn-arweinydd Ceidwadwyr yr Alban yn dweud ei bod hi’n hyderus na fydd rhaid iddi dynnu ei dillad ac y bydd ei “gwyleidd-dra a chanhwyllau llygaid eraill yn cael llonydd”.

Mae’n dweud bod yr hinsawdd wleidyddol yn dra gwahanol i 2015, pan enillodd yr SNP 56 o seddi yn San Steffan.

“Byddwn i’n hapus iawn i addo mynd yn noethlymun ar lannau Loch Ness a dioddef sesiwn wyllt o nofio Hogmanay pe bai’r fath ganlyniad yn digwydd, gan wybod yn iawn y bydd fy ngwyleidd-dra a chanhwyllau llygaid eraill yn cael llonydd,” meddai wrth osod yr her.

Sefyllfa’r Alban a’r SNP

Mae 59 o seddi ar gael yn yr Alban, ac mae gan yr SNP 35 ohonyn nhw ar hyn o bryd, tra bod gan y Ceidwadwyr 13.

Mae gan Lafur saith sedd a’r Democratiaid Rhyddfrydol bedair.

“Er mwyn cyrraedd y 50 hudolus, mae angen i’r SNP gipio 15 o seddi o dair plaid sy’n cynnig pethau cwbl wahanol ar Brexit, cael caniatâd ar gyfer refferendwm annibyniaeth arall, ataliad niwclear, yr economi yn gyffredinol ac yn enwedig gwladoli,” meddai.

“Yn ychwanegol at hyn, dydy’r SNP ddim yn targedu enillion yn unig.

“Maen nhw hefyd yn ceisio cau’r drws ar ragor o golledion.

“Yn 2017, diolch yn bennaf i bleidleiswyr o blaid yr Undeb yn pleidleisio gan ddefnyddio strategaeth dactegol, collodd Ms Sturgeon 21 o seddi a hanner miliwn o bleidleisiau mewn noson. 

“Mae rhan helaeth o’r hyn sydd ar ôl yn ymylol iawn.”

Dywed ymhellach fod pleidleiswyr o blaid y Deyrnas Unedig wedi hen arfer â phleidleisio tactegol yn erbyn yr SNP.

“Gadewch i ni ddweud fy mod i’n hyderus na fydda i’n nofio’n wyllt yn y dyfodol agos.”

Gwleidyddiaeth

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones