Gallai oedi atal Brexit yn llwyr, meddai Theresa May

Diweddarwyd am  
Baner Jac yr Undeb gyda'r gair Brexit drosti

Llun: CC0

Mae Theresa May, prif weinidog Prydain, yn rhybuddio y gallai gohirio Brexit atal ymadawiad Prydain â’r Undeb Ewropeaidd yn llwyr.

Mae’n bosib y gallai Brwsel geisio ymestyn y dyddiad ymadael pe bai aelodau seneddol yn San Steffan yn gwrthod cynllun Brexit Theresa May am y trydydd tro yr wythnos hon.

Ond byddai rhagor o oedi’n arwydd o “fethiant” Llywodraeth Prydain, meddai.

Pe na bai Prydain yn gadael yr Undeb Ewropeaidd erbyn Mawrth 29, mae posibilrwydd cryf y bydd rhaid cymryd rhan yn etholiadau Senedd Ewrop am y cyfnod seneddol nesaf.

Bydd Cyngor Ewrop yn cyfarfod ddydd Iau, ac mae Theresa May yn rhybuddio na fydd Prydain yn cael gadael yr Undeb Ewropeaidd os na fydd cytundeb cyn hynny.

“Gallen ni a dylen ni adael yr Undeb Ewropeaidd ar Fawrth 29,” meddai.

“Ond mae [oedi] yn rhywbeth y byddai pobol Prydain yn ei dderbyn pe bai’n arwain at gyflwyno Brexit yn brydlon.

“Mae’r dewis amgen, pe na bai’r Senedd yn gallu cytuno ar gytundeb erbyn hynny, yn waeth o lawer.”

Neges mewn erthygl

Mewn erthygl yn y Sunday Telegraph, mae Theresa May yn dweud bod arweinwyr Ewrop yn disgwyl “pwrpas clir” er mwyn ymestyn yr ymadawiad.

“Pe bai’r cynnig yn mynd yn ei ôl i’r cam cyntaf a bod rhaid cael cytundeb newydd, byddai hynny’n golygu estyniad mwy o lawer – a bron iawn y byddai angen i’r Deyrnas Unedig gymryd rhan yn etholiadau Senedd Ewrop ym mis Mai,” meddai.

“Mae’n anodd meddwl am y syniad y gallai pobol Prydain fynd i’r gorsafoedd pleidleisio i ethol aelodau seneddol Ewropeaidd dair blynedd ar ôl pleidleisio o blaid gadael yr Undeb Ewropeaidd.

“Ni all fod yna arwydd mwy peryglus o fethiant gwleidyddol y Senedd at ei gilydd.”

Collodd ei chynnig o 149 o bleidleisiau yn yr ail bleidlais, ond gallai nifer o aelodau seneddol gael eu perswadio i’w gefnogi er mwyn sicrhau rhyw fath o gytundeb.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Perthynas gymhleth Cymru a Lerpwl