Dominic Raab wedi’i benodi yn Ysgrifennydd Brexit

Diweddarwyd am  
Dominic Raab, yr Ysgrifennydd Brexit

Dominic Raab, yr Ysgrifennydd Brexit

Llun trwy wikimedia Commons CC BY 3.0

Mae Dominic Raab wedi cael ei benodi yn Ysgrifennydd Brexit, a hynny ar ôl i David Davis ymddiswyddo o’r swydd yn hwyr neithiwr (nos Sul, Gorffenbaf 8).

Roedd Dominic Raab, a oedd yn Weinidog Tai a Chynllunio, yn aelod blaenllaw o’r ymgyrch i adael yr Undeb Ewropeaidd yn ystod y refferendwm yn 2016.

Fe fydd Aelod Seneddol Esher & Walton, 44 oed, yn ymuno â’r Cabinet am y tro cyntaf wrth ddechrau yn y swydd.

Mae’r cyn-gyfreithwr wedi bod yn Aelod Seneddol ers 2010, ac yn aelod o’r Llywodraeth ers 2015.

Fe ddechreuodd weithio yn y Weinyddiaeth Gyfiawnder, cyn symud i’r  Adran Gymunedau ddiwedd mis Mai y llynedd.

Ymddiswyddiad David Davis

Fe ymddiswyddodd David Davis o’r llywodraeth ychydig ddyddiau ar ôl i Gabinet Theresa May gytuno ar gynllun a fyddai’n gweld y Deyrnas Unedig yn glynu’n agos wrth Frwsel yn dilyn Brexit.

Yn ei lythyr at y Prif Weinidog yn cyflwyno ei ymddiswyddiad, fe ddywedodd David Davis nad oedd yn cytuno â pholisi presennol y llywodraeth ynglŷn â Brexit.

Mae hefyd wedi dweud ers hynny bod y llywodraeth yn “rhoi gormod i ffwrdd, yn rhy rwydd” yn y trafodaethau â Brwsel, ond bod Theresa May yn “Brif Weinidog da”.

Mae dirprwy David Davis yn yr adran, Steve Baker, hefyd wedi ymddiswyddo.

Ymateb Carwyn Jones

“Mae ymddiswyddiad David Davis yn dangos bod Llywodraeth y Deyrnas Unedig mewn anhrefn lwyr dros Brexit,” meddai Prif Weinidog Cymru, Carwyn Jones, mewn neges ar Twitter.

“Mae angen cymryd camau brys i ddatrys yr anhrefn hwn. Mae angen sicrwydd ar fusnesau ac mae angen arweiniad a chyfeiriad ar y wlad.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Tywysogion Cymru – pa rai sy’n werth eu cofio?