Geiriau ar waliau’r ward – cerdd gan Fardd Plant Cymru

Diweddarwyd am  

Casia Wiliam, Bardd Plant Cymru

Llun: Sioned Birchall

Mae Bardd Plant Cymru yn cyhoeddi cerdd arbennig heddiw (Gorffennaf 5) er mwyn nodi pen-blwydd y Gwasanaeth Iechyd Gwladol (GIG) yn 70 oed.

‘Ti’ yw enw’r gerdd, ac mi fydd y darn yn cael ei gyflwyno gan y bardd ei hun, Casia William, i staff Ward Cilgerran, Ward Blant Ysbyty Glangwili.

Daw hyn fel rhan o gynllun Bwrdd Iechyd Hywel Dda i sicrhau bod wardiau plant yn rhan o’r dathliad, ac i gyflwyno llenyddiaeth i blant mewn modd “cyffrous”.

Mae’r gerdd wedi’i osod ar bosteri, ac mi fydd y posteri yma yn cael eu gosod mewn wardiau plant ledled y wlad.

“Braint”

“Roedd hi’n fraint o’r mwyaf cael ysgrifennu cerdd i ddathlu pen-blwydd y gwasanaeth yn 70,” meddai Casia Wiliam, Bardd Plant Cymru.

“Roeddwn i am wneud yn siŵr y byddai plant yn deall y gerdd, gan mai mewn wardiau plant y bydd hi’n ymddangos, felly mae hi’n syml, ac yn cyffwrdd ar y pethau sy’n gyffredin i ni gyd wrth ymweld ag ysbytai; y bobl garedig, y llenni lliwgar o gwmpas y gwely, ac wrth gwrs, y gofal.

“Gobeithio bydd y gerdd yn taro nodyn gyda rhieni a phlant sy’n ei darllen mewn wardiau plant yng Nghymru.”

Y gerdd

Ti yw’r un sy’n dweud “Mae’n iawn”,

yn tynnu coes i basio’r pnawn.

Ti yw’r un sy’n sychu’r gwaed,

yn gosod baglau wrth fy nhraed.

Ti yw’r llenni lliwgar braf

sy’n lliwio oriau hir yr haf.

Ti yw’r tiwb sy’n cario aer

i mi gael sgwrsio gyda’m chwaer.

Ti yw bîp y peiriant mawr

sydd wrth fy ngwely bach bob awr.

Ti yw’r un sy’n canu cân

pan fydda i wedi blino’n lân.

Ti yw’r un sy’n creu cast gwych

ac aros nes bod dagrau’n sych.

Ti yw’r doctor ddaw â gwên

a llygaid doeth a geiriau clên.

Ti yw’r nyrs sy’n nabod Mam,

yn nabod fi, yn gwybod pam.

Ti yw’r un sy’n gwagio’r pot,

yn gwagio’r bin, yn chwerthin lot.

Ti yw’r dwylo meddal, mud,

sy’n dod â chysur cynnes, clyd.

Ti yw’r curiad cyson, iach

sy’n dawnsio lond fy nghalon fach.

Ti yw’r ffrind sydd fyth ymhell,

yn ffrind am oes pan fydda i’n well.

Casia Wiliam

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed