RSS

Golwg360

MwyCau 

Llywodraeth Cymru yn dweud sut y bydd hi’n creu miliwn o siaradwyr Cymraeg erbyn 2050

Gorffennaf 11, 2017 01:00 Diweddarwyd am 10:22


Mae Prif Weinidog Cymru wedi dweud fod angen i’r “genedl gyfan berchnogi’r iaith” os ydi’r Llywodraeth am lwyddo gyda’r targed o greu miliwn o siaradwyr Cymraeg erbyn 2050.

Wrth lansio’r strategaeth mae Llywodraeth Cymru wedi amlygu tair thema i’w dilyn dros y 33 mlynedd nesaf sef – cynyddu’r nifer o siaradwyr Cymraeg, cynyddu’r defnydd o’r iaith a chreu amodau ffafriol.

Maen nhw hefyd am weld y canran o’r boblogaeth sy’n siarad Cymraeg bob dydd ac yn medru siarad mwy nag ychydig eiriau, yn codi o 10% i 20% erbyn 2050.

Addysg

O ran addysg mae Llywodraeth Cymru am sicrhau bod o leiaf 70% o ddysgwyr yn gallu dweud erbyn 2050 eu bod yn gallu siarad Cymraeg erbyn iddyn nhw adael yr ysgol.

Fe fyddan nhw am wed 150 yn fwy o grwpiau meithrin yn cael eu sefydlu dros y ddegawd nesaf ynghyd â chodi’r ganran o bob grŵp blwyddyn ysgol sy’n cael addysg cyfrwng Cymraeg i 30% erbyn 2031, ac yna i 40% erbyn 2050.

Maen nhw hefyd am gynyddu’r nifer o athrawon cynradd sy’n gallu addysgu drwy’r Gymraeg o 2,900 i 3,900 erbyn 2031; ac i 5,200 erbyn 2050.

O ran athrawon uwchradd, y targed yw ei godi o 1,800 i 3,200 erbyn 2031; ac i 4,200 erbyn 2050.

Maen nhw hefyd am ddenu mwy o athrawon i ddysgu’r pwnc ‘Cymraeg’ a diwygio addysg a sgiliau ôl-16 i gynnwys mwy o ddarpariaeth cyfrwng Cymraeg.

Defnydd o’r Gymraeg

O ran cynyddu’r defnydd o’r Gymraeg, mae Llywodraeth Cymru’n bwriadu adolygu’r ddeddfwriaeth sy’n cefnogi’r Gymraeg ynghyd ag “arwain drwy esiampl” gan gynyddu’r defnydd yn “ein gweithlu ein hunain.”

Byddan nhw’n creu ‘amodau ffafriol’ drwy sicrhau datblygiad economaidd, gwell technolegau iaith a datblygu rhaglen genedlaethol i wella ymwybyddiaeth o ddwyieithrwydd.

“Bwriadol uchelgeisiol”

Mae’r Prif Weinidog, Carwyn Jones, wedi cydnabod fod y targed yn un “[f]wriadol uchelgeisiol” gan ychwanegu bod “heriau o’n blaenau, ond heb os gallwn eu hwynebu gan wybod bod sail gadarn eisoes i’r gwaith”.

“I lwyddo, ry’n ni angen i’r genedl gyfan berchenogi’r iaith,” meddai.

Ac mae Gweinidog y Gymraeg a Dysgu Gydol Oes, Alun Davies, wedi dweud ei fod yn “hyderus” y bydd y cynllun “yn ein gosod ar y llwybr cywir i gynyddu nifer y siaradwyr, yn ogystal â’r defnydd sy’n cael ei wneud o’r iaith yn y gymuned, y gwaith a’r cartref.”

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.