Mae Llywodraeth Prydain yn lansio rhan cynta’ buddsoddiad o £246 miliwn i wella technoleg batris trydan.
Y nod, medden nhw, yw fod gwledydd Prydain yn arwain y byd o ran cynllunio, datblygu a chynhyrchu mathau newydd o fatris.
Fe fydd Her Faraday – sydd wedi ei henwi ar ôl un o arloeswyr trydan – yn para pedair blynedd gan wahodd cynigion am fuddsoddiadau.
Arbedion mawr
Y gred yw y bydd rheolau newydd ynghylch storio a defnyddio trydan yn arwain at arbedion mawr i ddefnyddwyr, gyda thechnoleg batris yn rhan allweddol o hynny.
Mae Her Faraday yn rhan o Strategaeth Ddiwydiannol Llywodraeth Prydain a gafodd ei lansio ynghynt eleni mewn Papur Gwyrdd.
Y nod, meddai’r Ysgrifennydd Diwydiant Greg Clarke, yw cael gwahanol sectorau i gydweithio – gan gynnwys diwydianwyr, gwyddonwyr a llywodraeth.
