Ymgyrchydd iaith yn cael ffurflen uniaith Saesneg er mwyn gadael carchar

Jamie Bevan yn siarad ym Merthyr heddiw
Cafodd Jamie Bevan ffurflen uniaith Saesneg i’w harwyddo er mwyn gadael carchar Prescoed heddiw.

Gwrthododd yr ymgyrchydd iaith â’i harwyddo a chafodd wybod bod rhaid iddo ddychwelyd i’w gell. Cafodd ei ryddhau ymhen hanner awr gyda sylw yn cael ei roi ar ei ffurflen adael yn nodi ei fod wedi gwrthod â’i llofnodi.

Aeth i annerch rali i’w groesawu adre i Ferthyr Tudful. Mewn araith emosiynol yng Nghanolfan Gymraeg Soar dywedodd Jamie Bevan fod ei gyfnod dan glo wedi gwneud iddo sylweddoli fod brwydr yr iaith yn parhau a bod rhaid gweithredu nawr yn hytrach na disgwyl i bethau newid yn y dyfodol.

Un arall a siaradodd o flaen y dorf o 50 o bobol oedd Aelod Cynulliad Gorllewin De Cymru, Bethan Jenkins, a chanodd Heather Jones gân.

Treuliodd Jamie Bevan 17 diwrnod dan glo yng ngharchar Caerdydd a charchar agored Prescoed, ar ôl cael dedfryd o 35 diwrnod gan ynadon Merthyr Tudful am wrthod talu dirwy.

Yn ystod ei gyfnod yng ngharchar Caerdydd cwynodd Jamie Bevan am nad oedd ffurflenni dwyieithog ar gael i garcharorion, a honnodd ei fod wedi dioddef “rhegfeydd a bygythiadau agored” gan swyddogion y carchar am iddo fynnu gwasanaethau Cymraeg.

10 sylw

Carys Rhys 30 Awst 2012, 13:30

Gwarth, ma’r ffaith bod hyn yn digwydd mewn sefydliad cyhoeddus yn afiach. Er hyn dwi dal ddim yn cytuno efo be nath o i fynd i carchar yn lle cynta. Pam peintio walia swyddfa MP, y ffordd cafodd S4C ei redeg yn y blynyddoedd blaenorol oedd y broblem, a’r agwedd dduwiol bod ganddyn nhw hawl hynt i sblashio cash cyhoedus, nid y berthynas newydd rhwng y BBC/MP’s etc i drio cadw rheolaeth ar y ffwls.

Dylan Evans 30 Awst 2012, 13:46

Ma genai ddau bwynt.
1) Dwi’n cytuno, dylai y ffurflenni fod yn ddwy-ieithog. Er deud hyn, mae o’n ‘iawn’ i Gymro dorri’r gyfraith, ond ddim yn iawn i’r carchar dorri rheol ?
2) Dwi’n Gymro, a ma darllen stori y llipryn yma yn fy’n ngwylltio i.
Mae o’n derbyn clod gan Cymdeithas yr iaith, sydd wedi rhoi statws arwr iddo.
Pam ath o i’r carchar ? Am dorri’r gyfraith.
Ma angen brwydro i gadw ein iaith, a ma cymdeithas yn neud gwaith da ar y cyfan, ond ma’r esiampl ma Jamie Bevan yn ddangos i’r genedl (heb son am ei blant bach a’i deulu) yn warth ag yn embaras llwyr.

Jones 30 Awst 2012, 16:45

Dwi ddim yn ryw ymgyrchydd iaith cryf ond rhaid deud- maer saga yma wedi bod yn hynod o siomedig.

– gafodd y dyn i roi yn y carchar oherwydd y iaith
– oedd na ambell i stori ar y newyddion ynglyn a ddiffyg ffurflenni.
– ond dal doedd na ddim newid. dwin derbyn nad yw rhan fwyaf o o bobl eisiau ffurflenni cymraeg ond sa HMP yn ddigon call fysa nw di cael un arbennig ir dyn yma.

Mae’r saga yma hefyd wedi dangos pa mor wan ydyr comisiynydd. Lle oedd y comisiynydd? pam bod na ddim newid mewn ffurflenni wedi’i neud?.

Rhys Gethin 31 Awst 2012, 00:58

Dwi’n edmygu safiad Jamie ynghylch y ffurflenni yn fawr, ond rhaid i mi gyfadde fy mod yn credu bod y safiad gwreiddiol, h.y. torri i mewn i swyddfa, yn aneffeithiol a gwan iawn. Mae’n efelychiad gwantan o safiadau llawer grymusach o’r gorffennol, ac ymddengys i mi fod y Gymdeithas yn tynnu llawer gormod o faeth o’r “hen ddyddiau”. Dwi’n hynod o ddiolchgar i Jamie am amlygu’r diffygion enbyd yn nwyieithrwydd ein sefydliadau, ond rhaid cofio mai safiad gwahanol i’r un gwreiddiol yw’r un yn erbyn y ffurflenni uniaith.

Danial 31 Awst 2012, 01:09

Dwi meddwl ddylsa chi edrych ar hwn

http://llygadddu.wordpress.com/

Jac 31 Awst 2012, 02:24

Cytuno – mae’n warthus nad oedd ffurflenni Cymraeg ar gael. Lle goblyn mae’r diweddar Fwrdd Iaith wedi bod ers 1993? Drafft o gynllun iaith o ddiawl! Ar y llaw arall, dydw ii ddim yn cytuno gyda’r Gymdeithas mai tor-cyfraith yw’r ffordd ymlaen. Cwbl anaeddfed ac amhroffresiynol.

Lisa 31 Awst 2012, 09:21

Cwpl i ffeithiau. Nid oes pwerau gorfodi dros gyrff y Goron, megis y Gwasanaeth Carchardai o dan Ddeddf yr Iaith Gymraeg 93.

Nid yw’r safonau iaith weithredol eto ac nid yw’n glir os bydd cyrff y Goron yn destun iddynt, darllen y Mesur pobl.

Guto 31 Awst 2012, 11:37

Mae’n deg dweud bod rhai o aelodau CyI i weld yn cymryd gormod o biti dros Jamie Bevan, dwn im a ydio ei hun yn cytuno â hynny, na thrwch o aelodau hŷn y mudiad sydd wedi bod drwy’r felin eu hunain yn y gorffennol. Serch hynny, wela i ddim byd o’i le â gweithredu uniongyrchol, di-drais, yn enwedig pan nad yw dulliau eraill yn gwneud tamaid o wahaniaeth. Mae agwedd y gwasanaeth carchardai yn dangos bod taeogrwydd o flaen cyfraith Lloegr yn dda i bygyr ôl.

Er y bu sôn am GyI yn symud i fod yn fwy o gorff lobîo, mae dyfodiad mudiadau eraill fel Dyfodol yr Iaith yn rhoi mwy o ryddid iddyn nhw ddal ati i fod yn ddraenen yn ystlys y sefydliad Prydeinig yng Nghymru. Dwi ddim yn aelod nac yn be fysa chi’n ei alw’n gefnogwr brwd, ond hir oes i Gymdeithas yr Iaith ddyweda i.

Sion 31 Awst 2012, 11:49

Methu cytuno gyda’r rhai sy’n beirniadu’r weithred wreiddiol. Roedd yn gyfraniad dewr i ymgyrch dorfol ehangach i ddiogelu S4C rhag toriadau anferth a rhag cael ei llyncu’n llwyr gan y BBC, penderfyniad cefn-amlen cwbl annemocrataidd gan ddynion di-glem yn Llundain. Llwyddodd yr ymgyrch o safbwynt annibyniaeth y Sianel, bydd S4C yn cadw mesur pwysig o annibyniaeth. Methodd yr ymgyrch i ddiogelu cyllid y Sianel, a hynny yn bennaf achos anallu pobl i uno tu ol yr ymgyrch gan ganolbwyntio yn lle hynny ar gecru am faterion mewnol S4C. Pe bai mwy o bobl wedi bod yn fodlon gwneud cyfraniad tebyg, mae’n bosib iawn na fyddai’r sianel wedi cael ei haneru mewn maint (o ran cyllid) fel sydd wedi digwydd. Hoffwn i allu dweud fy mod i wedi gwneud fy rhan, ond nid yw hynny’n wir. Diolch am bobl fel Jamie Bevan felly.

Mae’r ffordd mae’r gwasanaeth carchardai yn trin siaradwyr Cymraeg yn 2012 yn fy syfrdanu i. Ond mae darllen bod Jamie Bevan wedi gwrthod llofnodi ffurflenni Saesneg gan wybod y byddai’n cael triniaeth waeth o ganlyniad, yn fy llenwi i gyda hyder bod dal i fod pobl fydd yn sefyll yn erbyn y drefn. Rwy’n llawn edmygedd.

D. J. Lewis 11 Medi 2012, 23:21

Rwy’n ddiolchgar bod ’na rai o hyd sydd ag asgwrn cefn yng Nghymru. Pob parch iddo!

Mae’r sylwadau wedi cau.

Ymgyrchydd iaith yn cael ffurflen uniaith Saesneg er mwyn gadael carchar

Brwydr yr iaith yn parhau medd Jamie Bevan

Poblogaidd

Swyddi

Cynhyrchydd (Dwy swydd)

Cyfathrebwr Estyn Allan STEM (40% CALl)

Cynorthwyydd Materion Rheoleiddiol Ofcom Cymru

Pennaeth y Gwasanaethau Cyfreithiol (Dros Gyfnod Mamolaeth)

Cyfarwyddwr Astudiaethau Caplaniaeth

Swyddog Arweiniol Data

Swyddog Prosiect Ymbweru Bro (ardal Wrecsam)

Crëwr Cynnwys Digidol

Tiwtor Cymraeg ar gyfer y Gweithlu Addysg

Rheolwr Aelodaeth

← Stori flaenorol

Egluro dryswch Ffordd Penrhyn yn y Barri

Stori nesaf →

Undeb yn condemnio Prif Gwnstabl am dderbyn bonws o £6,500

Hefyd →

Bachgen, 15, ar fechnïaeth yn dilyn negeseuon bygythiol

10 sylw