Dyfed Edwards
Mae Arweinydd Cyngor Gwynedd, Dyfed Edwards wedi cyhoeddi aelodau ei gabinet yn dilyn yr etholiadau ar 3 Mai.
Mae 10 aelod ar y cabinet – naw o Blaid Cymru ac un o’r Blaid Lafur, sef Brian Jones o Gwm-y-Glo.
Plaid Cymru yw’r blaid fwyaf ar Gyngor Gwynedd gyda 37 o 74 sedd, ac maen nhw wedi dod i gytundeb gyda’r pedwar cynghorydd Llafur er mwyn arwain gyda mwyafrif ar y cyngor.
Sian Gwenllian o’r Felinheli yw’r Dirprwy Arweinydd a’r aelod sydd wedi cael y portffolio addysg. Mae cau ysgolion yn parhau yn bwnc llosg yn y sir ac enillodd Llais Gwynedd – sydd wedi bod yn llafar o blaid cadw ysgolion ar agor – 13 sedd ar y cyngor.
“Llywodraeth Gwynedd”
Dywedodd Arweinydd Cyngor Gwynedd, y Cynghorydd Dyfed Edwards: “Bydd Aelodau Cabinet yn gweithredu fel Gweinidogion mewn llywodraeth – Llywodraeth Gwynedd. Mae hyn yn golygu cyfrifoldeb sylweddol a’r angen i arwain a hynny er mwyn cyflawni ar ran pobl Gwynedd.
“Mae’n gyfnod heriol wrth gwrs, ond yn gyfnod sy’n llawn posibiliadau yn ogystal. Rwyf innau a’r Cabinet yn benderfynol o gyflawni dros y Cyngor er gwaetha’r sefyllfa ariannol sy’n ein hwynebu.”
Mae Gwynedd wedi symud i drefn gabinet o redeg y cyngor yn hytrach na system bwrdd a fu’n weithredol ers 1996. Daw hyn yn yn dilyn Mesur llywodraeth Leol Cymru.
Fel yng ngweddill siroedd Cymru bydd aelodau cabinet yn derbyn cyflog blynyddol o £28,780, o’i gymharu gyda chyflog o tua £12,000 ar gyfer cynghorydd o’r meinciau cefn.
Dyma restr o aelodau’r Cabinet a’u cyfrifoldebau:
| Portffolio | Deilydd | Maes cyfrifoldeb |
| Arweinydd | Dyfed Edwards | Arweiniad Strategol; Cynllunio Busnes |
| Dirprwy Arweinydd | Sian Gwenllian | Cyfathrebu |
| Addysg | Sian Gwenllian | Addysg, Aelod Arweiniol Plant a Phobl Ifanc |
| Gofal | R H Wyn Williams | Gwasanaethau Cymdeithasol; Iechyd (Strategol) |
| Amgylchedd | Gareth Roberts | Priffyrdd; Bwrdeistrefol; Trafnidiaeth; Ymgynghoriaeth |
| Amddifadedd | Brian Jones | Atal tlodi/Amddifadedd; Cydraddoldeb |
| Economi | John Wynn Jones | Economi; Adfywio; Caffael; Celfyddydau |
| Cynllunio | John Wyn Williams | Tai; Cynllunio; Cynllun Datblygu Lleol |
| Adnoddau | Peredur Jenkins | Cyllid; Adnoddau Dynol; Trawsffurfio |
| Gofal Cwsmer | Ioan Thomas | Gofal Cwsmer; Democratiaeth a Chyfreithiol; Gwarchod y Cyhoedd, Y Gymraeg |
| Gwynedd Iach | Paul Thomas | Hamdden; Gwynedd Iach; Gwasanaethau Ieuenctid; Darparu |
