Coronafeirws yng Nghymru – yr achos cyntaf wedi ei gadarnhau

Diweddarwyd am  

Mae’r achos cyntaf o goronafeirws wedi’i gadarnhau yng Nghymru, gyda’r claf yn ardal Abertawe.

Roedd yr unigolyn wedi teithio yn ôl i Gymru o ogledd yr Eidal lle mae dros 200 o achosion bellach wedi’u cofnodi.

Fydd dim rhagor o fanylion am yr unigolyn yn cael eu rhyddhau, a hynny er mwyn gwarchod ei gyfrinachedd.

Bellach mae 19 o achosion wedi’u cadarnhau yng ngwledydd Prydain.

Brynhawn ddoe cadarnhaodd Iechyd Cyhoeddus Cymru bod 263 o bobol yng Nghymru wedi derbyn profion am y firws hyd yn hyn.

“Paratoi’n dda”

“Hoffwn fanteisio ar y cyfle i sicrhau’r cyhoedd bod Cymru a’r Deyrnas Unedig wedi paratoi’n dda ar gyfer digwyddiad o’r math hwn,” meddai Prif Swyddog Meddygol, Dr Frank Atherton.

“Gan gydweithio â’n partneriaid yng Nghymru a’r DU, mae’r ymateb yr oeddem wedi paratoi ar ei gyfer wedi cael ei roi ar waith ac mae gennym fesurau cadarn i reoli heintiau er mwyn diogelu iechyd y cyhoedd.”

Cyngor Llywodraeth Cymru

“Byddwn yn parhau i wneud popeth o fewn ein gallu i ganfod yn gynnar achosion sydd wedi cyrraedd yma o dramor a’u hynysu i osgoi unrhyw ledaeniad pellach,” meddai Vaughan Gething, Gweinidog Iechyd Llywodraeth Cymru.

“Roedd disgwyl y datblygiad diweddaraf hwn a dylai pobl barhau i ddilyn ein cyngor – os ydych wedi dychwelyd o ardal yr effeithir arni neu os ydych yn pryderu’ch bod wedi bod mewn cysylltiad agos ag achos sydd wedi’i gadarnhau, ni ddylech fynd i’ch meddygfa nac i Adrannau Brys ysbytai.

“Dylech ffonio Galw Iechyd Cymru  ar 0845 46 47 neu 111 Cymru, os yw ar gael yn eich ardal. Bydd gwneud hyn yn golygu’ch bod yn cael eich asesu gan y staff cywir yn y Gwasanaeth Iechyd wrth hefyd gyfyngu ar y posibilrwydd o’i ledaenu i eraill.

“Gall pawb helpu i leihau’r siawns o ledaenu unrhyw feirws anadlol. Y cyngor yw ei ddal, ei roi yn y bin, ei ladd a golchi’ch dwylo.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Owain Glyn Dŵr a dysgu hanes Cymru – darlith Dr Elin Jones