Dirgelwch plac ‘Aberth Abergele’ yn parhau

Diweddarwyd  
Plac "Aberth Abergele"

Plac “Aberth Abergele”

Llun gan Adam Phillips

Mae Heddlu’r Gogledd yn gwrthod dweud pam eu bod yn dal eu gafael ar blac a gafodd ei osod i gofio dau o aelodau Mudiad Amddiffyn Cymru.

Er i’r heddlu gadarnhau bod y plac i gofio “Aberth Abergele” yn eu meddiant, nid ydyn nhw yn medru dweud pam bod y plac ganddyn nhw.

Fe gafodd y plac ei dynnu lawr gan Gyngor Conwy, cyn i’r heddlu fynd i swyddfeydd y cyngor i gasglu’r plac.

“Merthyron Abergele”

Mi gafodd y plac ei osod ar wal llyfrgell Abergele ddiwedd mis Mehefin, ar drothwy parêd i gofio “Merthyron Abergele” yn y dref.

Adeg arwisgiad Charles yn Dywysog Cymru yn 1969, roedd Mudiad Amddiffyn Cymru [MAC] yn ffrwydro bomiau er mwyn dangos eu gwrthwynebiad.

Ar y noson cyn yr arwisgo yng Nghaernarfon, bu farw Alwyn Jones a George Taylor wrth i fom roedden nhw yn ei osod ffrwydro yn Abergele, ger y rheilffordd fyddai yn cludo Charles i Gaernarfon.

Roedd y ddau yn aelodau o MAC ac ers deng mlynedd mae Adam Phillips o Gorwen wedi bod yn trefnu parêd i gofio “Merthyron Abergele”.

Adam Phillips fu yn trefnu bod plac yn cael ei osod ar y wal lle bu i’r ddau farw hanner canrif ynghynt.

O fewn hanner awr i ddadorchuddio’r plac ar Fehefin 29 eleni, roedd wedi ei dynnu lawr gan un o swyddogion Cyngor Sir Conwy.

Dywedodd llefarydd y cyngor: “Fe dynnodd Cyngor Bwrdeisdref Sirol Conwy’r plac i lawr gan ei fod wedi’i osod ar adeilad heb ganiatâd.”

Mae Cyngor Conwy wedi cadarnhau bod swyddogion Heddlu’r Gogledd wedi bod i nôl y plac o’u swyddfeydd nhw.

Ac er i Heddlu’r Gogledd gadarnhau bod y plac ganddyn nhw, nid ydyn nhw yn fodlon egluro pam eu bod wedi ei gasglu.

Roedd golwg360 wedi gofyn a fyddan nhw yn dychwelyd y plac at Adam Phillips.

“Nid ydym mewn sefyllfa i ateb y cwestiynau ychwanegol am y plac,” meddai llefarydd Heddlu’r Gogledd.

“Rhywbeth sinistr”

“Mae rhywbeth sinistr yn mynd ymlaen,” meddai Adam Phillips.

“Pam bod y plac gan yr heddlu? A pham nad ydw i’n gallu cael y plac yn ôl?

“Doedd yna ddim byd gwleidyddol ar y plac,” ychwanegodd.

“Doedd o ddim yn dweud Mudiad Amddiffyn Cymru arno fo, dim byd ond enwau’r dynion…

“Mae hyn yn dangos gymaint tydi’r wladwriaeth ddim eisiau i ni gofio pethau fel hyn.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Cofio Eirwyn Pontsiân – darlith Lyn Ebenezer