Galw ar Gyngor Caerdydd i agor ysgolion cyfrwng Cymraeg yn unig

Diweddarwyd am  
Dosbarth mewn ysgol

Llun: CCO

Mae 35 o bobl adnabyddus yng Nghymru yn galw ar Gyngor Caerdydd i sicrhau mai dim ond ysgolion cyfrwng Cymraeg fydd yn cael eu hagor ar draws y ddinas yn y dyfodol.

Ymhlith y rhai  sydd wedi llofnodi llythyr at y cyngor mae’r cerddor Cian Ciaran o’r Super Furry Animals, yr actores Mali Harries, y prifardd Catrin Dafydd, y gantores Heather Jones a’r awdur Jon Gower.

Yn y llythyr maen nhw’n dadlau bod angen i Gaerdydd fod ar flaen y gad er mwyn gweld cynnydd mewn lleoliadau cyfrwng Cymraeg sydd ar gael er mwyn agosáu at y targed o filiwn o siaradwyr Cymraeg erbyn 2050.

 “Rôl allweddol”

“Er mwyn cyrraedd targed Llywodraeth Cymru o filiwn o siaradwyr Cymraeg erbyn 2050, mae’n hanfodol bod cynghorau sir yn cynyddu eu darpariaeth o addysg Gymraeg nawr,” meddai’r llythyr.

“Fel dinas fwyaf Cymru, mae gan Gaerdydd rôl allweddol i’w chwarae os ydym am gyrraedd y nod.”

Mae’r llythyr hefyd yn nodi sut mae darpariaeth addysg Gymraeg yng Nghaerdydd yn “hollol annigonol” ar hyn o bryd gyda mwy a mwy o rieni o bob cefndir yn dymuno gweld eu plant yn gallu siarad Cymraeg.

“Mae rhai o’r plant o’r cefndiroedd mwyaf difreintiedig yn cael eu rhwystro rhag cael mynediad at ein hiaith a’r holl gyfleoedd mae hi’n ei chynnig oherwydd ddiffyg darpariaeth,” meddai’r llythyr.

Miliwn o siaradwyr

Mae Mabli Siriol o Gymdeithas yr Iaith hefyd yn ategu’r honiad fod gan Gaerdydd rôl ganolog i’w chwarae os am gyrraedd miliwn o siaradwyr Cymraeg.

“Yn anffodus, ar hyn o bryd, nid yw’r twf mewn addysg Gymraeg yn y ddinas yn ddigonol i fodloni’r galw mawr sydd am lefydd mewn ysgolion Cymraeg, na chwaith i Gaerdydd gyrraedd y targedau lleol ar y daith tuag at 2050,” meddai Mabli Siriol.

“Galwn ar Gyngor Caerdydd i ddangos yr uchelgais a’r arweiniad sydd ei angen er mwyn sicrhau addysg Gymraeg i bawb yn ein prifddinas ac arwain y ffordd tuag at filiwn o siaradwyr Cymraeg.”

“Adlewyrchu’r galw”

 Dywedodd Dirprwy Arweinydd Cyngor Caerdydd, a’r Aelod Cabinet dros Addysg, Cyflogaeth a Sgiliau, y Cynghorydd Sarah Merry: “Bydd ein capasiti cyfrwng Cymraeg yn parhau i gynyddu i adlewyrchu’r galw cyffredinol, gan sicrhau sefydlogrwydd ariannol ein hysgolion cyfrwng Cymraeg presennol a fyddai mewn perygl os byddwn yn gosod llefydd ychwanegol yn rhy gyflym.

“Trwy gynyddu ein haddysg cyfrwng Cymraeg mewn ffordd strategol, rydym yn sicrhau bod ein hysgolion newydd ar sylfaen ariannol gadarn; mae ein hysgolion cyfrwng Cymraeg presennol yn parhau i fyw; a bod yr ysgolion a gynigiwn yn darparu ar gyfer yr ystod o ddewisiadau rhieni a welwn yng Nghaerdydd.

“Mae rhagamcanion yn awgrymu cynnydd calonogol iawn yn y galw am ysgolion uwchradd cyfrwng Cymraeg dros y blynyddoedd nesaf.

“Ar hyn o bryd mae gennym ddigon o gapasiti yn ein hysgolion uwchradd cyfrwng Cymraeg, ac mae llefydd ar gael o hyd. Yn y tymor byr i ganolig, gellir cwrdd â’r galw cynyddol a ragwelir trwy gynyddu lleoliadau gan ddefnyddio’r capasiti yn ein tair ysgol uwchradd cyfrwng Cymraeg bresennol.”

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Anrhydeddau Gorsedd y Beirdd 2019