Mae nifer y seddi sydd ar gael yn y Stadiwm Rygbi Cenedlaethol wedi gostwng, a hynny er mwyn cynyddu faint o lefydd sydd ar gael i’r anabl.
Yn dilyn gwaith addasu diweddar sydd wedi costio tua £100,000, mae 46 yn fwy o lefydd i gadeiriau olwyn – sy’n cynyddu’r cyfanswm i 214.
Mae’n golygu bod y nifer o lefydd sydd ar gael i bobol sy’n anabl ond sy’n gallu symud wedi ei ddyblu hefyd, ac mae 111 yn fwy o seddi ar gael i ofalwyr.
Ond mae nifer y seddi drwyddi draw wedi gostwng o 74,500 i 73,931.
“Ymgysylltu gyda mwy o bobol”
“Un o’n prif dargedau yn Undeb Rygbi Cymru yw ymgysylltu gyda mwy o bobol,” meddai rheolwr y stadiwm, Mark Williams.
“Rydym wedi gwella a gwella ein cynnig ar gyfer gwylwyr anabl yn sylweddol, mae hyn wedi golygu gostyngiad bach yn ein gallu ar gyfer digwyddiadau ar y cae yn y Stadiwm,” ychwanegodd.
Gwnaed y gwaith yn dilyn galw gan lawer o gefnogwyr anabl i gynyddu’r ddarpariaeth are u cyfer.
O ganlyniad, mae Undeb Rygbi Cymru wedi gostwng ychydig ar y nifer o docynnau mae’n rhannu i glybiau.
Denu’r anabl
“Mae strategaeth anabledd rygbi Cymru yn darparu ystod o gyfleodd i gymryd rhan yn y gêm o chwarae, gwirfoddoli a gwylio,” meddai llefarydd ar ran Undeb Rygbi Cymru.
Mae Cymru yn chwarae Lloegr yn y Chwe Gwlad ar ddydd Sadwrn, Chwefror 23 – y gêm gyntaf ers i’r stadiwm ddathlu ei ben-blwyddyn 20 oed.
