Ansicrwydd tros ddyfodol siop gigydd enwog ‘Johnny 6’, Bangor
Mae ansicrwydd tros ddyfodol siop gigydd hanesyddol ym Mangor, gyda rhai adroddiadau lleol yn awgrymu ei bod wedi cau ei drysau am byth.
Mae siop G Williams a’i Fab, sy’n cael ei hadnabod yn lleol fel siop ‘Johnny 6’ wedi bod ar gau am ddiwrnod, a dim rhybudd nac eglurhad ar y llenni metel.
Mae’r siop ar y Stryd Fawr yn y ddinas yn adnabyddus am gig o safon a selsig a byrgyrs cartref ac yn fwy diweddar am gynnig gwasanaeth têc-awê a rholiau brecwast a chig rhost.
Mae wedi bod yn gwasanaethu dinas Bangor ers 148 o flynyddoedd.
Roedd y siop ar agor ddydd Sadwrn diwethaf (Gorffennaf 7) ond erbyn nos Fawrth, roedd hi wedi cau, ac mae lle i gredu y gallai wyth aelod o staff fod allan o waith.
Yr wythnos ddiwethaf, ymddangosodd y siop ar restr Llywodraeth Prydain o fusnesau sydd wedi methu â chynnig yr isafswm cyflog i’w gweithwyr.
