Cai O’Marah yn cefnogi Lloegr? Dim peryg, meddai cerddor yn Colombia

Diweddarwyd  

Cai O’Marah yn ei grys melyn Colombia

Llun oddi ar ei dudalen Facebook

Doedd rhai o drigolion Colombia “ddim yn deall” pam nad oedd cerddor o Ddyffryn Ogwen yn cefnogi Lloegr yng Nghwpan y Byd – wrth iddo wylio’r gêm fawr gyda nhw neithiwr (nos Fawrth, Gorffennaf 3).

Dyna ddywed Cai O’Marah wrth golwg360 heddiw, wrth i’r wlad lle mae’n teithio ynddi ar hyn o bryd baratoi i groesawu eu chwaraewyr aflwyddiannus gartref o Gwpan y Byd yn Rwsia.

Postiodd y cerddor, sy’n aelod o’r band Radio Rhydd, lun ohono’i hun ar ei broffil Facebook yn gwisgo crys Colombia, ac yntau wedi cyrraedd y wlad ers diwedd mis Mai.

Fe enillodd Lloegr ar ôl ciciau o’r smotyn i anfon Colombia adre’ o’r gystadleuaeth yn rownd yr 16 olaf.

O ddathlu i dristwch

“Nes i wylio’r gêm mewn bar mewn tref o’r enw Acacias,” meddai Cai O’Marah wrth golwg360.

“Roedd hi’n drist erbyn y diwedd, ond mi oeddan nhw’n dathlu cyrraedd penalties fel oeddan nhw wedi curo’n barod!

“Oeddan nhw’n neidio i fyny ac i lawr, yn chwifio poteli llawn cwrw rownd topiau’u pennau, a chwythu chwiban, ac yn y blaen.”

Ac mae’n dweud iddo gael ymateb da wrth wisgo crys Colombia ar gyfer y gêm.

“Ges i sawl un yn bîpian arna’i yn eu ceir fel o’n i’n cerdded heibio. Ac un neu ddau ddim yn deall pam o’n i ddim yn cefnogi Lloegr!”

Dysgu’r trigolion lleol am Gymru

Ond i Cai O’Marah, sy’n dysgu Saesneg i drigolion Colombia tra ei fod yntau’n dysgu ychydig o Sbaeneg – roedd yn gyfle hefyd i’w haddysgu nhw am Gymru.

“Geshi sgwrs neithiwr (drwy gyfieithydd) ac mi oedd o’n holi pam ydw i mor groes i’r Goron Brydeinig a ddim yn cefnogi tîm pêl-droed Lloegr.

“Neshi sôn wrtho am ychydig o hanes Cymru – a Phrydain – a sôn am y ‘Welsh Not’ a’r ymdrechion i chwalu iaith a diwylliant Cymru. A sôn am hanes Tryweryn hefyd.

“Wnaeth o ddeud, ‘entiendo, entiendo’ (Dw i’n deall) yn syth wedyn.”

Fe fydd Cai O’Marah yn aros yn Colombia tan Orffennaf 23, cyn hedfan i’r Amazon ar gyfer rhan nesaf ei daith.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed