Tair wythnos yn weddill i “achub yr Academi Gymreig”

Diweddarwyd  

Y llythyr at aelodau’r Academi Gymreig

Llun: golwg360

Mae gan aelodau Yr Academi Gymreig dair wythnos i gynnig ffordd newydd o redeg y gymdeithas o awduron, neu fe fydd y corff yn cael ei ddiddymu ddiwedd Mawrth y flwyddyn nesaf.

Os na fydd grwp o bobol yn dod yn ei flaen â chynllun ar gyfer rhedeg y gymdeithas, fe fydd y brand yn dod i ben, oni bai am ei ddefnyddio fel rhan o deitl ysgoloriaethau i awduron newydd, ac yn rhan o deitl gwobr cyfraniad nodedig i fyd llenyddiaeth sydd hefyd yn dwyn enw Glyn Jones.

Dyna fyrdwn pecyn sydd wedi’i anfon at aelodau, cymrodyr ac aelodau anrhydeddus o’r Academi Gymreig gan Lleucu Siencyn, Prif Weithredwr asiantaeth Llenyddiaeth Cymru.

Mae llythyr, dyddiedig Mai 11, 2018, gan Tom Anderson, cadeirydd yr Academi Gymreig, yn rhoi mis o amser i aelodau ymateb i’r her o greu strwythur newydd ar gyfer yr Academi, ynghyd â diffinio pwrpas ymarferol i’r corff o awduron a sefydlwyd gyntaf yn 1959.

Ar hyn o bryd, yr Academi Gymreig yw “cymdeithas genedlaethol llenorion Cymru”, yn ôl ei chyfansoddiad ei hun. “Mae’r gymdeithas yn cynrychioli llenorion Cymru ac ysgrifennu Cymraeg a Chymreig yng Nghymru a thu hwnt.”

Diben yr Academi Gymreig yw dathlu cyfraniad llenorion Cymru; lobïo ar ran llenorion Cymru; meithrin cymuned o lenorion; darparu cymorth eirioli; ynghyd â chefnogi datblygiad gyrfaol llenorion Cymru.

Cyfarfod cyffredinol 

Yng nghyfarfod cyffredinol arbennig yr Academi Gymraeig ar Ebrill 14, 2018, pleidleisiodd yr Aelodau/Cymrodyr/Aelodau Anrhydeddus oedd yn bresennol dros roi mis o amser i griw o bobol gynnig cynllun ar gyfer rhedeg yr Academi yn y dyfodol.

Ond, os na fydd Bwrdd Rheoli yr Academi Gymreig, fel ag y mae ar hyn o bryd, yn barnu fod cynigion priodol wedi dod i law, fe fydd y corff yn cael ei ddiddymu.

Mae angen i unrhyw grwp â diddordeb mewn ymgymryd â’r gwaith o redeg yr Academi Gymreig o Ebrill 1, 2019 ymlaen, gyflwyno cais erbyn Mehefin 14 eleni.

Y telerau 

Fe fydd angen i unrhyw grwp ddatgan yn eu Cynllun Busnes, y meini prawf canlynol:

  • Gweledigaeth ar gyfer yr Academi Gymreig, yn cynnwys nodau ac amcanion y gymdeithas o awduron;
  • Targedau;
  • Strategaeth ar gyfer datblygu’r Academi Gymreig a’i haelodaeth; sut y bydd yn cael ei gweithredu; a sut fydd y cyfrifoldebau am wahanol agweddau’r cynllun yn cael eu rhannu;
  • Cyllideb;
  • Cynllun marchnata;
  • Llythyrau o gefnogaeth i’r cais.

Fe fydd angen i unrhyw grwp sy’n anfon cais i mewn, fod yn barod i gael Cyfansoddiad newydd yn ei le erbyn Mawrth 31, 2019, ynghyd â Phwyllgor/Bwrdd Rheoli; Trysorydd; Cadeirydd; cyfrif banc yn enw’r AG; a chyfeiriad busnes.

Hanes yr Academi Gymreig 

Fe gafodd yr Academi Gymreig ei sefydlu yn 1959 “yn dilyn sgyrsiau” rhwng Bobi Jones a Waldo Williams. Prif amcan y gymdeithas yn dilyn y cyfarfod cyntaf ym 1960, oedd sefydlu cylchgrawn llenyddol Cymraeg, Taliesin.  Crëwyd yr adran Saesneg ei hiaith yn 1968.

Yn 1998 fe ddaeth yn asiantaeth genedlaethol i hybu llenyddiaeth ar ran Cyngor Celfyddydau Cymru – enw’r asiantaeth hon oedd ‘Academi’.

Yn 2011, fe ymunodd Academi â Chanolfan Ysgrifennu Tŷ Newydd a dod yn ‘Llenyddiaeth Cymru’.

Mae’r Academi Gymreig wedi bodoli fel cymdeithas llenorion Cymru, o fewn i Academi a than eleni.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed