Panel cyfweld S4C: Bebb yn galw am newid

Guto Bebb
Mae Aelod Seneddol wedi ysgrifennu at S4C gan ddweud na ddylai aelod o Awdurdod S4C fod ar y panel i benodi Prif Weithredwr newydd.

Dywedodd Guto Bebb, AS Aberconwy, ei fod wedi ysgrifennu at Huw Jones, Cadeirydd yr Awdurdod, gan ddweud na ddylai’r bargyfreithiwr Winston Roddick QC fod ar y panel.

Mae Winston Roddick QC yn un o naw aelod o’r Awdurdod fydd ar y panel wrth gyfweld yr ymgeiswyr ddydd Gwener.

Mae Golwg 360 ar ddeall fod Arwel Ellis Owen, y Prif Weithredwr dros-dro, Rhodri Williams, Aled Eurig, a Geraint Rowlands ymysg yr enwau sy’n debygol o gael eu cyfweld.

‘Ffrind’

Ar y Gofrestr o Fuddiannau ar wefan S4C mae’r bargyfreithiwr Winston Roddick yn nodi ei fod “yn ffrind i Arwel Ellis Owen, cyfarwyddwr Cambrensis, cwmni cyfarwyddo ffilmiau annibynnol”.

“Mae Arwel Ellis Owen hefyd wedi trin datganiadau i’r wasg ar fy rhan o dro i dro,” meddai.

Ond dywedodd Guto Bebb wrth Golwg 360 na ddylai rhywun sy’n ffrind i un o’r ymgeiswyr fod ar y panel penodi.

‘Cwmwl’

“Y peth ola’ y mae’r sianel eisiau ydi fod cwmwl tros benodiad Prif Weithredwr newydd. Efo’i gefndir cyfreithiol, mi ddylai Winston Roddick fod yn ymwybodol o hyn,” meddai Guto Bebb wrth Golwg360.

“Os oedd hi’n bwysig ei fod yn datgan diddordeb yn ôl yn 2009 mae’n hanfodol erbyn hyn. Mae eisiau i Awdurdod S4C symud o’r sefyllfa lle maen nhw’n creu’r stori.”

Dywedodd llefarydd ar ran S4C y bydd pob aelod o’r panel yn ymwybodol o gyfeillgarwch Arwel Ellis Owen a Winston Roddick cyn y cyfweliad ddydd Gwener.

“Fe fydd gofyn i bob aelod o’r awdurdod wneud datganiad o unrhyw ddiddordebau neu gysylltiadau cyn cychwyn y cyfarfod,” meddai llefarydd ar ran S4C wrth Golwg360.

Gwrthododd y sianel gynnig sylw pellach am sylwadau Guto Bebb.

18 sylw

Dylan Llyr 13 Medi 2011, 12:56

Mae Mr Bebb yn llygad ei le yn yr achos yma.

Mewn difri calon, dydi S4C ddim yn gwneud pethau’n hawdd iddyn nhw’u hunain, na’dyn?

Jones 13 Medi 2011, 13:51

Dylan- ti’n llygad dy le hefyd!

Weithiau dwi’n teimlo bod rhai yn S4C eisiau cael penawdau gwael yn y Western Mail; jest am y sylw!

Glyn Thomas 13 Medi 2011, 13:54

Anodd credu bod nhw hyd yn oed yn ystyried gadael i Winston Roddick fod yn bresenol !

James 13 Medi 2011, 15:44

Mae’n dangos faint mor aneffeithiol yw’r Cadeirydd newydd.

Ma’r hen bois yn dal i neud beth yffarn ma nhw moen.

Adam Jones 13 Medi 2011, 16:07

Anaml iawn fyddai’n cytuno gyda’r annwyl Bebb ond y tro hwn dwi’n cytuno cant y cant, mae’n warth ac yn ymddangos yn gwbl amhroffesiynol.

Ond dyna’r fath o ynys o wirioni o boblach Pontcanna sydd yn rhedeg ein sianel genedlaethol dyddie ’ma. Dewch â S4C i’r gorllewin, i Gaerfyrddin neu Aberystwyth.

Hedd Gwynfor 13 Medi 2011, 17:35

Ymunwch gyda ni ar Ddiwrnod Deffro S4C:
http://cymdeithas.org/2011/09/21/diwrnod_deffro_s4c.html

8yb, Dydd Mercher, Medi 21
Pencadlys S4C, Parc Ty Glas, Llanisien, Caerdydd

Jones 13 Medi 2011, 17:50

Adam- efallai fysa fo’n syniad dod a’r sianel nol i’r Fro…. ia ochrau g’narfon.

Adam Jones 13 Medi 2011, 18:07

Haha wel ie yn wir, Caernarfon, Llangefni, Caerfyrdidn, Rhydaman, Aberteifi neu Eglwyswrw does dim ots lle mae’r swyddfeydd dim ond eu bod nhw’n agos at y Cymry Cymraeg caib a rhaw fel petai, rheiny sydd yn Gymry naturiol ac ond yn ceisio byw eu bywydau o fewn eu cymunedau Cymraeg.

Rhys Gethin 13 Medi 2011, 18:41

Mae gwir angen i S4C symud i’r Fro. Mae’r manteision yn rhai pwerus dros ben: mwy o waith yn y Fro, teuluoedd Cymraeg yn cael eu magu mewn ardal naturiol Gymreig yn hytrach na rhyw ghetto ddinesig, ac ar ben hyn oll, sianel a fyddai’n atebol ac yn cynrychioli’r genedl.

Cris Dafis 13 Medi 2011, 19:09

Lot o nonsens adferol yn cael ei falu yn y sylwadau fan hyn. Yn ol Cyfrifiad 2001, yng Nghaerdydd y bu’r cynnyd uchaf yn niferoedd siaradwyr Cymraeg, yn Nhorfaen y bu’r cynnyd uchaf yn y ganran. O ran siaradwyr, Caerfyrddin welodd y cwymp mwyaf o ran niferoedd. Yng Ngheredigion y disgynnodd y ganran fwyaf.
Beth yw’r “fro” ’ma ych chi’n son amdani erbyn hyn? Hefyd, o’r hyn dwi’n ddeall, does fawr ddim o aelodau’r Awdurdod yn byw ym Mhontcanna. Ond mae llawer o Gymry Cymraeg “ciab a rhaw” (i ddefnyddio un o hoff ddywediadau adam) yn byw mewn llawer rhan o Gaerdydd. Mae angen i’r sianel wasanaethau cymuned lawer ehangach nag ardal Caernarfon.

Adam Jones 13 Medi 2011, 20:13

Cris mor ddi-chwaeth a di flewyn ar dafod unwaith yn rhagor dwi’n ei weld?

Nid yw newid canran, cynnydd na chwaith gostyngiad mewn niferoedd o siaradwyr Cymraeg yn golygu dim byd ar yr hyn rydym ni’n ei drafod.

Mae’r ardaloedd yn y gorllewin yn colli Cymry Cymraeg o hyd (yn rhannol gyfrifol am y gostyngiad y soniaist amdano) oherwydd diboblogi a diffygion dod o hyd i waith, pe byddai sefydliad mawr fel S4C yn dychwelyd i’r ardaloedd hyn byddai’n lleddfu ychydig ar ostynigad mewn canranau a niferoedd sy’n siarad Cymraeg gan fod y Cymry Cymraeg hyn yn gallu aros o fewn eu cymunedau ac hefyd arddel ar waith sydd trwy gyfrwng y Gymraeg.

Mae pawb yn ddigon parod i ymosod ar unrhyw drafodaeth parthed symud pencadlys S4C o Lanishen i’r gorllewin, ac yn cael eu dallu yn hytrach ar deimladau personol yn hytrach na gweld gwir gwerth y syniad.

Llinos Morgan 13 Medi 2011, 20:41

Mae’r niferoedd sy’n symyd i Gaerdydd o’r Gogledd bellach yn frawychus. Bob tro mae rhywyn yn codi’r pwynt dani’n cael ein cyhuddo o fod yn adferwyr. Mae ein pobol ifanc yn cael eu sugno lawr rhyw dwmffat mawr i Gaerdydd er mwyn llenwi swyddi di bwrpas a di werth. Mae nifer fawr o’n pobol ifanc galluog yn tan gyflawni yn y brifddinas a fydd ganddo ni ddim digon o Gymry Cymraeg i fod yn bennaethiaid mewn diwidiant neu’r sector gyhoeddus cyn i chi fedru dweud – “Grangetown yw’r Caernarfon newydd”

Adam Jones 13 Medi 2011, 20:45

Eiliaf Llinos, mae’n anffodus braidd bod y sawl sydd yn byw yn yr ynys bach o wirioni yng Nghaerdydd yn methu gweld yr hyn sydd yn digwydd, ac nid yn unig o’r gogledd noder, mae pobol ifanc (dwi’n un ohonyn nhw) i gyd yn brysur gadael y cwm er mwyn mynd i Gaerdydd, ble fydd y Gymraeg yn ein cymoedd wedyn?

Yr hyn sydd yn amlygu’i hun fan hyn yw teimladau hunanol egoistaidd dros y bybl ma yng Nghaerdydd heb fawr o ots am y Gorllewin gwyllt.

Llinos Morgan 13 Medi 2011, 20:55

Roedd yna esiampl berffaith o’r agwedd hunanol, egotistaidd mae Adam yn son amdano ar Radio Cymru Ddydd Llun. Rhaglen gan neb llai na’r Arch Dderwydd oedd mewn gwirionedd dim mwy na sales pitch ar gyfer byw yn y brifddinas. “Mae bob dim mor gyfleus yma”. Dwi’n siwr fod arwerthwyr tai Caerdydd yn ddiolchgar iawn iddo.

Bethan Mair 13 Medi 2011, 22:31

Cytuno i raddau helaeth gyda holl sylwadau Cris, ac nid oes angen ei gystwyo am fynegi barn sy’n cynnwys cynifer o ffeithiau. Paris; Llundain; Stockholm; Dulyn… bu prifddinasoedd wastad yn botiau-jam i bobl ifanc dawnus dynnu atynt. Un drafferth i ni yng Nghymru yw mai Llundain sy’n dal i ddenu llawer o Gymry uchelgeisiol, nid hyd yn oed Caerdydd.

Oes, mae cnoc ar S4C i feddwl bod gadael i’r Barnwr Roderick gyfweld un a restrir ganddo fel cyfaill agos yn dderbyniol. Ond nid oherwydd mai yn Llanisien y mae pencadlys S4C y mae hynny; y mae oherwydd diffyg corfforaethol a diffyg trefniadaeth rymus yn y sefydliad. Y mae hefyd oherwydd nad oes perthynas ddigon agos rhwng y corff sy’n rheoli S4C yn y pen draw (sef San Steffan) a’r sefydliad yng Nghaerdydd. Nid sylw ar bwy ddylai reoli S4C yw hyn, ond ffaith ynghylch y sefyllfa bresennol.

Parthed y ddadl ynghylch pwy yw cynulleidfa S4C, mae miloedd yn fwy o wylwyr y gallai S4C ei chyrraedd, ond fyddai’r lleiafrif llafar ddim yn hoffi’r rhaglenni fyddai’n eu denu hwy. Holwch CBAC faint yn fwy o ddysgwyr y Gymraeg sy’n defnyddio Pecyn y De o’i gymharu â’r rheiny sy’n dysgu gyda Phecyn y Gogledd. Yn y de y mae’r siaradwyr Cymraeg, ond oherwydd natur y gymdeithas yno, a’r ffaith mai canran lai sydd yno ymhlith y boblogaeth lawer, lawer mwy, maen nhw’n ddi-lais ac yn meddwl mai pobl Caernarfon yw’r Cymry go-iawn. Nawr, mae gan S4C broblemau, ond mae Cymry Cymraeg rhugl sy’n meddwl nad ydyn nhw’n haeddiannol o’u Cymreictod yn LLAWER mwy o broblem.

Bedwyr Clwyd Griffiths 13 Medi 2011, 23:02

Mae angen symud pencadlys S4C yn sicr, pam ddim gogledd dwyrain? Rhywle fel Rhuthun, Dinbych, Llanelwy, neu well fyth i Sir Fflint, Wyddgrug, Y Fflint, Wrecsam, dangos fod y Gymraeg yn iaith sy’n fywiog a perthyn ir oes fodern. Lle gwell.

Martin Williams 16 Medi 2011, 13:19

Os yw Cymry Cymraeg yn eu hugeiniau o’r ‘Fro Gymraeg’ eisiau ehangu gorwelion, agoriad llygad etc yna gwell symud i wlad arall, dysgu iaith arall, byw mewn dinas ddifyr…
Sori, ond tydw i erioed wedi llwyr ddeall y busnas yma o Gymry Cymraeg sy’n mynd i Gaerdydd am ychydig o flynyddoedd a sydd jesd yn cymdeithasu hefo’u gilydd- a neb arall (yn tueddu i fod yn wir- ond nid pob tro wrth reswm).
Pencadlys S4C yng Nghaerdydd- wedi bod yn gamsyniad o’r cychwyn cyntaf (1982?)

Rhys Llwyd 20 Medi 2011, 00:08

Cris ofynod “Beth yw’r “fro” ‘ma ych chi’n son amdani erbyn hyn?” Does dim diffiniad perffaith felly mae’n well sôn am enghreifftiau. Beth am Gaernarfon felly fel enghraifft o specimen drefol o’r “Fro”. Hynny yw, rhywle lle mae lot (86%) o’r boblogaeth yn siarad Cymraeg. Canlyniad hynny yw mae’r Gymraeg yw iaith naturiol y gymuned gyfan sy’n peri fod modd i chi gael ei addysg a’ch high-cultre trwy gyfrwng y Gymraeg fel yng Nghaerdydd ond mae modd i chi hefyd, yn wahanol i Gaerdydd, gerdded mewn i unrhyw gaffi a chlywed pawb (bron) yn siarad Cymraeg gyda’i gilydd. Holl staff y “chains” yn eich syrfio chi’n Gymraeg boed yn McDonalds neu KFC (ych a fi i fwyd y ddau, ond dyna ni!). Mae’n siwr fod yna fecanic neu ddau yng Nghaerdydd yn siarad Cymraeg. Yng Nghaernarfon maen nhw i gyd yn siarad Cymraeg. Dwi’n cofio cael dyn tacsi yn siarad Cymraeg yng Nghaerdydd unwaith – yma mae nhw i gyd yn siarad Cymraeg.

Mae’n debyg mae problem llawer o drigolion y de ddwyrain gyda’r cysyniad o “Fro Gymraeg” yw nad ydy nhw ishe byw mewn cymuned lle mae’r Gymraeg yn iaith fwyafrifol/normal. Mae nhw yn hapus yn byw mewn cymuned ddwyieithog gyda elfenau “uchel” eu diwylliant yn Gymraeg neu ddwyieithog ond pethau dydd i ddydd fel ordro Big Mac a sortio allan teiars newydd y car yn Saesneg. Os ydych chi yn hapus gyda’r split yna, wel iawn, rhydd i bawb i’w ddewis. Yn bersonol, ar ôl symud i Gaernarfon a profi cymuned fwyafrifol Gymraeg ar ôl cael fy magu mewn tref oedd yn Gymreig ei delwedd ond oedd a’r gymuned o siaradwyr Cymraeg ymhell dan y 50% a i byth yn ôl.

Er mod i ddim yn credu y dylai’r BBC gymeryd S4C drosodd mae’n rhaid cydnabod fod y BBC wedi cymryd camau mawr yn ddiweddar i symud llawer o’u hadrannau allan o Lundain gan gynnwys y cynllun arfaethedig i symud adrannau mawr iawn i Fanceinion. Pe bae i’r BBC lwyddo i draflyncu S4C byddai’n ddifyr gweld os bydda nhw, yn unol a’i trend ddiweddar, yn dymuno adleoli S4C i Gaernarfon fel y mae nhw’n adleoli 5 Live o Lundain i Manceinion.

Mae’r sylwadau wedi cau.

Panel cyfweld S4C: Bebb yn galw am newid

Dweud na ddylai’r bargyfreithiwr Winston Roddick QC fod ar y panel

Poblogaidd

Swyddi

Cynhyrchydd (Dwy swydd)

Cyfathrebwr Estyn Allan STEM (40% CALl)

Cynorthwyydd Materion Rheoleiddiol Ofcom Cymru

Pennaeth y Gwasanaethau Cyfreithiol (Dros Gyfnod Mamolaeth)

Cyfarwyddwr Astudiaethau Caplaniaeth

Swyddog Arweiniol Data

Swyddog Prosiect Ymbweru Bro (ardal Wrecsam)

Crëwr Cynnwys Digidol

Tiwtor Cymraeg ar gyfer y Gweithlu Addysg

Rheolwr Aelodaeth

← Stori flaenorol

Rhybudd am “oblygiadau byd eang” i’r cynhesu yn yr Arctig

Stori nesaf →

Aros i glywed am wraig sydd wedi ei herwgipio yn Kenya

Hefyd →

Bachgen, 15, ar fechnïaeth yn dilyn negeseuon bygythiol

18 sylw