Undeb Rygbi â “lle i wella” o ran y Gymraeg – Dafydd Iwan

Diweddarwyd  
Y stadiwm yn llawn, a'r chwaraewyr ar y maes

Stadiwm Principality

Llun: David Roberts CC2.0 trwy Comin Wicimedia

Mae gan Undeb Rygbi Cymru “le i wella” wrth hyrwyddo’r iaith Gymraeg o fewn eu camp, ac mae eleni’n gyfle i “ail-bwysleisio’r neges” yn ôl y canwr Dafydd Iwan.

Mae’n ddeng mlynedd i’r wythnos hon (Hydref 31) ers colli un o gewri’r genedl, Ray Gravell, ac mae Dafydd Iwan yn sôn amdano fel un o’r “ychydig rai sy’n gallu cyfuno’r Cymry Cymraeg a’r di-gymraeg mor naturiol”.

“Mi’r oedd e’n adnabyddus i bawb yng Nghymru p’un â’u bod nhw’n dilyn rygbi ai peidio,” meddai.

Am hynny, mae’r canwr yn siŵr y byddai Ray Gravell hefyd wedi dymuno gweld yr undeb rygbi’n gwneud mwy dros yr iaith.

Y Gymraeg – pêl-droed a rygbi

“Er eu bod nhw’n defnyddio’r Gymraeg dw i’n credu fod yna le i wella,” meddai Dafydd Iwan wrth golwg360.

“Mae’n amlwg bellach fod yr awdurdodau pêl-droed yng Nghymru wedi gweld pwysigrwydd Cymreigio eu holl drefniadau gan gynnwys eu hymwneud â’r tîm cenedlaethol. Cael y tîm i feddwl fel Cymry a sôn am hanes Cymru a’r iaith wrth y chwaraewyr.”

“Gyda rygbi mi fyddai hi’n haws gwneud hynny, ond mae’r awdurdodau rygbi yn araf yn Cymreigio’r ffordd y maen nhw’n cyfathrebu gyda phobol Cymru.”

Ac mae’r wythnos hon yn gyfle i “ail-bwysleisio’r neges honno” meddai, wrth i bobol gofio am Ray Gravell.

Diffuant

Wrth gofio amdano mae Dafydd Iwan hefyd yn talu teyrnged i’w “gymeriad twymgalon” a dyn “hollol ddiffuant”.

Mae’n sôn iddo gael llawer o waith darlledu gyda’r BBC a’i fod wedi cael ei gynghori i beidio â dangos ei safbwyntiau’n rhy amlwg.

Ond yn ôl Dafydd Iwan – “wnaeth o ddim newid dim ar ei ddaliadau. Mi wnaeth e ddal yn gefnogol iawn i achos Cymru a’r Gymraeg ac yn ei chael hi’n anodd iawn i guddio’i deimladau wrth i Gymru chwarae.

“Roedd o’n gymeriad mor hoffus, roedd o’n cael gwneud pethau efallai byddai pobol eraill ddim yn cael eu gwneud,” meddai wedyn.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd