Ieuan Wyn Jones ‘wedi ymddiheuro i’r Frenhines’

Ieuan Wyn Jones - ar ei wyliau
Roedd Ieuan Wyn Jones wedi anfon ei ymddiheuriadau o flaen llaw at y Frenhines am na fyddai yn bresennol yn yr agoriad swyddogol y Senedd ddoe, meddai Plaid Cymru heddiw.

Dywedodd llefarydd ar ran y blaid wrth Golwg 360 ei fod ar wyliau estynedig ar hyn o bryd – gwyliau yr oedd wedi eu trefnu ymhell o flaen llaw, cyn iddo wybod dyddiad agoriad swyddogol y Senedd.

Mae Arweinydd Plaid Cymru wedi ei feirniadu’n llym dros y deuddydd diwethaf ar ôl methu a bod yn bresennol yn y Senedd.

Yn ogystal â methu ymweliad y Frenhines ddoe, cafodd ei feirniadu gan y Prif Weinidog Carwyn Jones, heddiw.

Dywedodd fod penderfyniad Ieuan Wyn Jones i gadw draw yn ystod tymor y Cynulliad yn “anghredadwy”.

“Nid y neges yr ydyn ni eisiau ei gyfleu ydi bod yr wrthblaid yn gallu mynd ar eu gwyliau,” meddai Carwyn Jones.

Dywedodd swyddfa Plaid Cymru fod eu harweinydd wedi anfon ei ymddiheuriadau at y Frenhines cyn ei hymweliad a’r Senedd ddoe, ac y dylai fod yn ôl ym Mae Caerdydd yr wythnos nesaf.

19 sylw

Adam Jones 8 Mehefin 2011, 17:03

Pam sticio at straeon fel hyn o hyd GOLWG? byddai’n dechrau’ch galw chi’n Golwg Frenhinol cyn bo hir dim ond llif o straeon am y frenhiniaeth sydd gennych, er mwyn y blincin nefoedd.

Gwerfyl Jones 8 Mehefin 2011, 18:05

Fe fyddwn wedi meddwl y byddai’n hollol amlwg i’r byd a’r betws (a hyd yn oed Ieuan Wyn Jones) y byddai’r Cynulliad yn eistedd yr wythnos yma

Jones 8 Mehefin 2011, 19:04

Rhaid deud MAE na gwestiynau pam nad ydy IWJ yn y Cynulliad heddiw. Cytuno a Jones2, eitha amlwg y bysa y Cynulliad yn eistedd heddiw.

Lavinia 8 Mehefin 2011, 20:17

Cytuno. Mae gan Golwg360 ogwydd anfaddeuol o genedlaetholgar a gwrthfrenhinol ynghyd ag obsesiwn â’r iaith Gymraeg.

Mae fel darllen gwefan Plaid Cymru.

Mwlsyn 8 Mehefin 2011, 21:37

Fel cenedlaetholwr, Lavinia, dwi’n meddwl fod IWJ wedi gwneud cawlach go iawn o aros ar wyliau yn hytrach na mynd i agoriad Senedd ei wlad.

Dylsai wedi dweud wrth ei wraig neu ffrindiau neu bwy bynnag oedd gydag e, ‘sori, ond mae Cymru’n dod gyntaf fan hyn, stopiwch pwdu a stopiwch nagio. Dyna fy job.’

Dafydd 8 Mehefin 2011, 22:36

Dwi’n credu bellach y bydd rhaid i Ieuan Wyn ymddiswyddo fel arweinydd y Blaid yn syth achos hyn.

Mae nawr wedi tynnu’r carped oddi tan ei Blaid. Gall Plaid Cymru ddim gyhuddo Carwyn Jones o ‘gysgu ar y job’ neu fod yn ‘Brif Weinidog gwan’ pan fod arweinydd PC methu bod yn boddyrd i droi fynny i agoriad y Cynulliad.

Diffyg crebwyll wleidyddol syfrdannol gan Ieuan Wyn. Mae wedi difetha naratif Plaid Cymru am y flwyddyn nesa. Well iddo ymddiswyddo’r wythnos yma.

Pam na ffoniodd un o ACau Plaid Cymru a dweud wrth Ieuan Wyn i ddweud wrth ei wraig fod yn rhaid iddo hedfan nôl i Gymru, petai ond am ddiwrnod.

A beth ddiawl yw esgus gwan Llyr Huws Griffiths dros beidio bod yn y Senedd – fod e’n cwrdd ’da grwpiau gwirfoddol yn y Gogledd? Mae bod yn weriniaethwr yn ddigon teg a dealladwy ond mae rhyw esgus bach fod ‘gwaith i’w wneud’ yn sarhaus. Sarhaus i ddeallusrwydd yr etholwyr a sarhaus i Gymru a’r senedd – does bosib nad oes modd dathlu bodolaeth ein Senedd am 1 diwrnod o fewn 4 mlynedd o oes Cynulliad. Gwan, gwan, gwan.

CGT 9 Mehefin 2011, 08:01

Hollol – dylid dweud “. Na – tydw i ddim yna ar egwyddor oherwydd fy mod yn gwrthwynebu’r frenhiniaeth” .
IWJ – mae pob munud mae hwn yn aros fel arweinydd yn mynd ac annibynniaeth awr yn bellach i ffwrdd.

SEITHENYN 9 Mehefin 2011, 09:42

Ma Dafydd yn llygad ‘i le.

Gyrfa IWJ ar ben. Yn profi unwaith eto bod pob gyrfa wleidyddol yn gorffen mewn methiant. Trist iawn, very sad, roedd IWJ yn haeddu gwell.

Llyr Huws Griffiths am fod yn wahanol – dechrau ei yrfa gyda methiant. Roedd ei eglurhad am ei absenoldeb yn embaras llwyr. Roeddwn yn ei wylio o du ol y soffa.

Y neges i ACau Plaid ar hyn o bryd yw, does ganddoch chi ddim i glochdar amdano, felly byddwch dawel, penau lawr, gwnewch eich gwaith cartref a dewch allan pan fyddwch wedi cael eich ty mewn trefn. . . . . . . a hir oes i Dafydd El.

Jones 9 Mehefin 2011, 09:54

Pryd mae’r ddadl am Daf El am ddechra? amser am is-etholiad yn Dwyfor i ethol rywun Plaid Cymru go iawn??

Hedd Gwynfor 9 Mehefin 2011, 10:45

mmm… Dafydd, Seithennyn a Jones, dwi’n derbyn eich beirniadaeth o Ieuan Wyn, ond methu deall eich beirniadaeth o Llyr o gwbwl. Mae e wedi dweud yn hollol agored ei fod wedi boicotio agoriad y frenhines gan ei fod yn weriniaethwr, a bod pethe pwysicach ganddo i’w wneud ar y diwrnod na mynd i’r seremoni. Gweler ei sylwadau yn y Daily Post e.e: http://www.dailypost.co.uk/news/north-wales-news/2011/06/04/plaid-cymru-ams-to-snub-queen-s-official-opening-of-welsh-assembly-55578-28817381/

“I’m a republican and don’t consider myself to be the Queen’s subject.

“As an AM I’m answerable to the people of Wales rather than to an unelected, unaccountable monarch.

“Millions of pounds spent every year bankrolling the monarchy could be better spent elsewhere. That’s why I’ll be spending the day getting on with the job I was elected to do.

“I stood to become an AM because I wanted to tackle the many injustices I see around me. Taking part in the ceremonial pomp and pageantry of the Royal Opening won’t contribute much to that end and that’s why I won’t be going along.”

Hedd Gwynfor 9 Mehefin 2011, 10:48

Lavinia, mae Golwg360 yn cyhoeddi erthyglau a straeon sydd o ddiddordeb i Gymry Cymraeg, ac sydd yn aml yn cael eu hanwybyddu gan y cyfryngau Saesneg a gwasanaeth Cymraeg y BBC. Gwasanaeth gwych, ond efallai bod yn well gennyt ti ddarllen deunydd y Daily Mail, a gweddill y wasg Seisnig a’u gogwydd genedlaetholgar Brydeinig?

SEITHENYN 9 Mehefin 2011, 11:48

Mae Hedd G am ein cyfeirio at eiriau Llyr HG.

“I’m a republican and don’t consider myself to be the Queen’s subject.” Minnau hefyd, ond dwi ddim yn colli cwsg dros y mater.

“As an AM I’m answerable to the people of Wales . . . .” Nagyw ddim, mae LlHG yn atebol i’w etholwyr yn rhanbarth y gogledd.

That’s why I’ll be spending the day getting on with the job I was elected to do. Cafodd LlHG ei ethol i fod yn gynrychiolydd yn y Cynulliad ac am hynny mae’n cael ei dalu. Mae ‘getting on with the job’ yn golygu bod yn bresennol yng nghyfarfodydd y Senedd, dyna sy’n dod gyntaf. Gall ymweliadau yn ei etholaeth ddigwydd pan nad yw’r Senedd yn eisedd.

Beth yw’r Gymraeg am pompous git?

Morus y Gwynt 9 Mehefin 2011, 11:49

Hedd – mae rhan gyntaf ateb Llyr yn gryf a chynhyrfus. Ond mae’r wfftio ar pomp agoriad y Senedd braidd yn wag. Onid yw’n deg, pwysig hyd yn oed, ein bod ni’n cael un diwrnod mewn 5 mlynedd i ddathlu agor Senedd Cymru?

Hoffwn weld rhywun arall heblaw’r Frenhines yn ei hagor, ond faswn i dal eisiau gweld pomp a pasiant yn yr agoriad hynny. Mae’n iawn dathlu weithiau. ‘Sdim rhaid bod yn bwiritan o hyn.

Russ 9 Mehefin 2011, 12:46

Gwbl hapus bod rhai o’r Pleidwyr wedi anwybyddu’r proses ar egwyddor. Ac unrhyw Gweriniaethwr/wraig o unrhyw Blaod arall yn y dyfodol. Ar diwedd y dydd mae hi’n Frenhines Lloegr – fel NHW yn galw hi dros yr oesoedd.

Ond i IWJ i fynd ar ei wyliau nid yn un peth na’r llall. Siomedig iawn.

Owain Meredith 9 Mehefin 2011, 16:59

Cytuno’n llwyr am Llyr Huws Gruffydd. ‘Mae gen i bethau amgenach iw gwneud’ wetws e ar y radio

Y noson honno roedd yn cael ei ffilmio yn cerdded rownd y bae ar gyfer newyddion. Yn amlwg mae digon o amser da fe i i gael ei ffilmio yn hytrach na gwasanaethu ei etholwyr, ond dim digon o amser i fod yn bresennol yn agoriad ein pedwerydd cynulliad. Cynulliad dani genedlaetholwyr cyffredin wedi ymladd mor galed iw sicrhau.

Dwi’n gefnogwr rhonc i Blaid Cymru ond mae rhai o’r aelodau yma’n actio fel plant wir

Hedd Gwynfor 9 Mehefin 2011, 21:15

Anghytuno’n llwyr Twrch. Mae IWJ yn fater gwahanol, ond i’r pedwar wnaeth boicotio’r agoriad swyddogol am eu bod yn weriniaethwyr, dwi’n eu cefnogi 100%,

CGT 9 Mehefin 2011, 21:25

Mae’ n amlwg fod angen i Blaid Cymru ail feddwl am ei egwyddorion sylfaenol – efallai na ddylai rhai ohonom berthyn i’r un Plaid bellach a DET a IWJ ( yr wyf yn siarad yma fel swyddog o fewn cangen lle mae dipyn o hollt) , ac fod angen
ail blaid wladgarol , ond y tro hyn un sydd yn genedlaetholgar .
Mae angen i IWJ fynd ar fyrder , ac i’w gyd-aelodau drefnu cyri go gyfleus. Dylai PC hefyd ddechrau ystyried coleddu cyfalafiaeth o ddifrif, gan fod sosialaeth a’r ddibyniaeth ar y wladwriaeth les a gwariant cyhoeddus yn mynd i gadw dosbarth gweithiol y de yn nyth y blaid Lafur am byth.
Ni chredaf, gyda’r llaw , fod Lavinia cweit o ddifrif ymhob beth y mae hi’n ei ddweud.

eirwyn 10 Mehefin 2011, 00:01

Millions of pounds spent every year bankrolling the monarchy could be better spent elsewhere. That’s why I’ll be spending the day getting on with the job I was elected to do.

meddai Llyr yn ôl Hedd. 65c y flwyddyn sy’n mynd o’m arian treth i gadw’r frenhiniaeth. Mae llawer mwy na hynny yn cael ei wario ar arfau ac am gyfarfod â gofynion yr iaith Gymraeg i ychydig iawn o bobl. Mae’r wlad yn derbyn arian mawr yn ôl oddi wrth y frenhiniaeth trwy dwristiaeth, statws rhyngwladol a phwysau economaidd — problemau ddaw yn sgil arfau ac iaith. Parhaf i dalu fy 65ceiniog – mae’n fargen.

A Hedd – rydym yn byw mewn gwlad sy’n rhan o wladwriaeth Brydeinig felly y frenhines yw’n pennaeth gwladol ac fe ddylai Llyr wybod hynny. Os oes hawl gan Llyr i beidio dangos cwrteisi i’w bennaeth fel Aelod ei Chynulliad, felly tebyg y byddet hefyd yn dadlau nad oes angen i’r un rhiant na phlentyn ddilyn cwrs Cymraeg mewn ysgol os ydynt o egwyddor yn erbyn hynny er, fel Llyr, eu bod yn rhan o wladwriaeth Gymru.

Pa ryfedd bod Cymru mewn fath gawl gyda phobl fel chi yn ceisio ei rhedeg!

alun lewis 15 Mehefin 2011, 14:44

buse’r frenhines ddim wedi bod ’na, os buse royal ascot wedi bod arno, a gweud y gwir r’oedd rhai o’r aelodau yn edrych fel ei bod yn mynd i royal ascot. ces i ofn pan weles i hat rosemary butler, para mewn sioc.

Mae’r sylwadau wedi cau.

Ieuan Wyn Jones ‘wedi ymddiheuro i’r Frenhines’

Dweud ei fod wedi trefnu ei wyliau cyn gwybod pryd y byddai y Senedd yn ail-agor

Poblogaidd

Swyddi

Cynhyrchydd (Dwy swydd)

Cyfathrebwr Estyn Allan STEM (40% CALl)

Cynorthwyydd Materion Rheoleiddiol Ofcom Cymru

Pennaeth y Gwasanaethau Cyfreithiol (Dros Gyfnod Mamolaeth)

Cyfarwyddwr Astudiaethau Caplaniaeth

Swyddog Arweiniol Data

Swyddog Prosiect Ymbweru Bro (ardal Wrecsam)

Crëwr Cynnwys Digidol

Tiwtor Cymraeg ar gyfer y Gweithlu Addysg

Rheolwr Aelodaeth

← Stori flaenorol

Pecyn economaidd Iwerddon “ddwywaith gymaint â chynllun Prydain”

Stori nesaf →

Dim ‘sychdwr’ yng Nghymru

Hefyd →

Bachgen, 15, ar fechnïaeth yn dilyn negeseuon bygythiol

19 sylw