Brynle Williams
Fe fydd teulu, ffrindiau a gwleidyddion yn bresennol yn angladd yr Aelod Cynulliad, Brynle Williams, ddydd Llun.
Dywedodd swyddogion y blaid Geidwadol eu bod nhw’n bwriadu atal yr ymgyrch etholiadol er mwyn talu teyrnged i’r ffermwr o Gilcain.
“Fe fyddwn ni’n atal yr ymgyrch etholiadol am y diwrnod,” meddai llefarydd ar ran ymgyrch y Ceidwadwyr.
Fe fu farw Brynle Williams, AC Ceidwadol rhanbarth Gogledd Cymru, yn 62 oed yr wythnos diwethaf.
Fe fydd ei angladd yn cael ei gynnal ger y man lle y cafodd ei fagu yn yr Wyddgrug, Sir y Fflint.
Bydd arweinydd y Ceidwadwyr Cymreig, Nick Bourne, a’r Dirprwy Prif Weinidog, Ieuan Wyn Jones, ymysg y galarwyr.
Daeth Brynle Williams i sylw’r cyhoedd yn ystod y protestiadau petrol yn 2000.
Daeth yn Aelod Cynulliad a llefarydd y Ceidwadwyr ar amaeth yn 2003.
Ar ôl ei farwolaeth ddydd Gwener, dywedodd y Prif Weinidog David Cameron ei fod yn “gawr o ddyn” ac yn “angerddol iawn”.
Ychwanegodd Prif Weinidog Cymru, Carwyn Jones, ei fod yn “gymeriad lliwgar ac yn ymgyrchydd gwydn”.
Bydd yr angladd yn digwydd yng Nghilcain am 1pm ddydd Llun.
Dywedodd y teulu nad oedden nhw eisiau blodau ond y gallai galarwyr roi arian tuag at uned ganser Ysbyty Glan Clwyd neu Hosbis Nightingale House.
