RSS

Golwg360

MwyCau 

Diffyg Cymraeg yn Theatr Sherman yn “warth”

Hydref 5, 2017 15:22 Diweddarwyd Hydref 6, 2017 12:26


Sharon Morgan (Llun cyhoeddusrwydd)
Mae’n “warth” bod Theatr Sherman yng Nghaerdydd ddim yn darparu adnodd datblygu sgriptiau yn y Gymraeg bellach.

Dyna yw barn bersonol Aelod Pwyllgor Equity Cymru, yr actores Sharon Morgan, sydd am weld yr adnodd “hollbwysig” yn cael ei ail gyflwyno i’r theatr.

Dechreuodd y theatr gynnig y ddarpariaeth pan chwalodd cwmni Sgript Cymru, a dim ond yn ddiweddar mae’r gymuned theatrig wedi sylweddoli ei fod wedi dod i ben.  

“Mae wedi diflannu – mewn ffordd, heb yn wybod i ni,” meddai Sharon Morgan wrth golwg360.

“Yn sydyn rydym ni’r gymuned theatrig wedi sylweddoli ein bod ni wedi colli adnodd hollbwysig i ddweud y gwir.

“Mae’n warth o beth bod y sefyllfa wedi dirywio i’r fath raddau. Mae’n hanfodol i unrhyw genedl i gael adnodd lle mae datblygu sgriptiau newydd a datblygu ysgrifenwyr yn digwydd.

“Ac mae wedi dod â’r ffocws ar gwmnïau Cymraeg a be maen nhw’n gwneud dros yr iaith Gymraeg. Be sy’n bwysig yw bod hyn ddim yn cael ei weld fel ticio bocs – mae’n gwbl hanfodol.”

Y Gymraeg

Symptom o broblem ehangach yw hyn yn ôl Sharon Morgan ac mae’n tynnu sylw at ddiffyg staff Cymraeg yn Theatr Sherman a diffyg Cymry ym “mhrif sefydliadau” y wlad.

“Y broblem sydd gyda ni, dw i’n meddwl, o ran y celfyddydau yn gyffredinol yng Nghymru, yw bod ein prif sefydliadau ddim yn cael eu rhedeg  gan Gymry neu bobol sydd yn ymwybodol o’n hanes a’n diwylliant ni – ac felly [does] dim buddsoddi yn ein dyfodol ni fel cenedl,” meddai.

Mae’r actores yn honni bod “neb” yn adeilad y theatr yn siarad Cymraeg ar wahân i wirfoddolwyr y swyddfa docynnau. 

Mae Sharon Morgan hefyd yn dweud nad oedd y Gymraeg yn “hanfodol” ar hysbyseb swydd Is-Gyfarwyddwraig Artistig y theatr.

Mae golwg360 wedi gofyn i Theatr Sherman am ymateb.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.