Ailagor yr A48 yn gynt na’r disgwyl

Ffordd yr A48 yn Sir Gaerfyrddin
Mae’r gwaith atgyweirio ar ffordd ddwyreiniol yr A48 yn Sir Gaerfyrddin wedi’i gwblhau a’r lôn wedi’i hailagor ar ôl bod ynghau am bron i chwe wythnos.

Daeth y gwaith i ben nos Sul (Hydref 30) am 10yh, a hynny ddeuddydd cyn y disgwyl.

Bu’n rhaid cau’r ffordd yn wreiddiol er mwyn atgyweirio’r bibell sy’n cludo tanwydd o burfa Valero ym Mhenfro i derfynellau ym Manceinion a Kingsbury.

Ond bu’n rhaid cau’r ffordd orllewinol wedi hynny wrth iddi ddod i’r amlwg fod 140,000 litr o gerosin wedi’i ollwng ac wedi llifo i Nant Pibwr ger Nant-y-caws gan ladd nifer o bysgod.

“Mae cwblhau’r gwaith angenrheidiol ar yr A48 ac ailagor y ffordd ddeuol ddwyreiniol yn rhyddhad i fodurwyr a phobol yn byw yn lleol ar lwybr y gwyriad sydd wedi dioddef wythnosau o amharu ac anghyfleustra,” meddai un o Brif Arolygwyr Heddlu Dyfed Powys, Peter Roderick.

“Rydym yn ddiolchgar i’r cyhoedd am eu hamynedd yn ystod y cyfnod hwn.”