Aelodau Llafur yng Nghwm Cynon yn dewis ymgeisydd

Ann Clwyd
Fe fydd aelodau Llafur yng Nghwm Cynon heddiw yn dewis eu hymgeisydd ar gyfer yr etholiad cyffredinol nesaf.

Mae Ann Clwyd yn un o bedwar ymgeisydd sydd wedi cyhoeddi eu bwriad i sefyll am sedd y blaid yn etholiad 2015.

Y tair merch arall fydd yn cystadlu am y sedd yw Katie Antippas, Susan Pickering ac Aysha Raza oddi ar restr fer o ferched yn unig.

Fe benderfynodd arweinwyr y Blaid Lafur bod yn rhaid i Ann Clwyd, 77, gael ei hail-ddewis i sefyll fel ymgeisydd yng Nghwm Cynon, er ei bod wedi cynrychioli’r ardal ers 1984.

Daeth y penderfyniad wedi i Ann Clwyd gyhoeddi ym mis Chwefror eleni na fyddai’n sefyll fel AS yn yr etholiad cyffredinol nesaf. Ond fe wnaeth dro pedol ym mis Medi a dweud ei bod wedi ail-ystyried yn dilyn anogaeth gan bobol leol.

Fe ddywedodd y Blaid Lafur fod y broses o ddewis ymgeisydd arall wedi dechrau ar ôl iddi ddweud na fyddai’n sefyll eto.

Ffrae

Daeth penderfyniad Ann Clwyd i ail-ymgeisio yn dilyn ffrae oedd wedi corddi ar ôl i Lafur orchymyn bod yn rhaid i’r blaid yn lleol benodi merch arall fel ei holynydd.

Roedd y blaid leol yn chwyrn yn erbyn y syniad ac yn bygwth peidio bod yn rhan o’r broses i ddewis olynydd.