Cynghorwyr yn cefnogi carchar newydd i Sir Ddinbych

Mae cynghorwyr Sir Ddinbych wedi cefnogi’r galw am garchar newydd yng ngogledd Cymru.

Bu Bwrdd Arweinyddiaeth Ranbarthol Gogledd Cymru’n ymgyrchu am garchar i’r rhanbarth ers pum mlynedd.

Aelodau chwe chyngor y gogledd, y Comisiynydd Heddlu a Throsedd, Heddlu’r Gogledd, Awdurdod Tân ac Achub y Gogledd a Bwrdd Iechyd Prifysgol Betsi Cadwaladr yw aelodau’r Bwrdd Arweinyddiaeth, ac maen nhw wedi bod yn lobïo’r Weinyddiaeth Gyfiawnder ers pum mlynedd.

Cafodd yr ymgyrch gefnogaeth y Cyngor Sir yn dilyn cyfarfod yn Rhuthun ddoe.

‘Angen carchar lle mae’r Ddeddf Iaith yn weithredol’

Dywedodd arweinydd Cyngor Sir Ddinbych, y Cynghorydd Hugh Evans, mai darparu gwasanaethau trwy gyfrwng y Gymraeg yw un o’r prif resymau dros gymeradwyo’r galw.

“Mae’n newyddion ardderchog fod Gogledd Cymru ar y rhestr fer o ranbarthau i’w hystyried ar gyfer carchar newydd a rhoddodd cynghorwyr Sir Ddinbych eu cefnogaeth unfrydol i’r cais.

“Rydym wedi ein cyffroi gan y posibilrwydd y bydd carchar yn cael ei adeiladu yng Ngogledd Cymru.

“Byddai’n cynnwys buddsoddiad sylweddol yn economi’r rhanbarth a gallai greu cannoedd o swyddi newydd.

“Mae angen y buddsoddiad a’r swyddi arnom ond mae hefyd angen carchar arnom lle mae Deddf yr Iaith Gymraeg yn weithredol er mwyn i ddiwylliant Cymreig gael ei gydnabod yn y system garchardai.

“Credwn fod dadl gref dros gael carchar yng Ngogledd Cymru a bydd y Bwrdd Arweinyddiaeth Ranbarthol yn parhau i lobïo’r Llywodraeth. Mae’r rhain yn ddyddiau cynnar, ond byddwn yn parhau gyda’r deialog ac yn aros i’r llywodraeth benderfynu a fu ein rhanbarth yn llwyddiannus.”