RSS

Golwg360

MwyCau 

Pennaeth ITV yn camu o’r neilltu

Mai 3, 2017 16:39 Diweddarwyd am 18:30


Mae Prif Weithredwr ITV, Adam Crozier wedi cyhoeddi ei fod yn camu o’r neilltu ar ôl saith mlynedd yn y swydd.

Fe fydd yn gadael ei swydd ar Fehefin 30, a bydd enw ei olynydd yn cael ei gyhoeddi maes o law.

Cyn ymuno â’r darlledwr, fe fu’n bennaeth ar Saatchi & Saatchi, Cymdeithas Bêl-droed Lloegr a’r Post Brenhinol.

Ers iddo fod yn bennaeth ITV, mae pris cyfrannau’r darlledwr wedi codi dros 200% wrth iddyn nhw symud oddi wrth hysbysebion i ddibynnu ar greu a gwerthu sioeau poblogaidd i ddarlledwyr eraill.

Mewn datganiad, dywedodd cadeirydd ITV, Syr Peter Bazalgette fod Adam Crozier “wedi gwneud cyfraniad ffantastig i ITV”, gan dalu teyrnged i’w “arweinyddiaeth gref a’i ymroddiad personol”.

Llenwi’r bwlch

Bydd Syr Peter Bazalgette bellach yn Gadeirydd Gweithredol, tra bydd Ian Griffiths yn derbyn swydd Prif Swydd Gweithredol a Chyfarwyddwr Cyllid.

Fe fydd cwmni Spencer Stuart yn arwain y broses o benodi pennaeth newydd.

Mae disgwyl i Adam Crozier fynd i weithio yn y sector preifat.

Dywedodd ei fod yn “falch eithriadol o’r hyn ry’n ni wedi’i gyflawni wrth droi ITV yn un o’r busnesau cyfryngau a chynnwys mwyaf llwyddiannus a deinamig yn y byd”.

Llwyddiannau a methiannau

O dan arweiniad Adam Crozier, mae refeniw ITV wedi tyfu o fwy nag £1b, tra bod enillion wedi codi 338%.

Ond eleni, cyhoeddodd ITV ei ostyngiad cyntaf ers 2009 mewn refeniw hysbysebion, ond roedd elw cyn treth y darlledwr yn £847m yn 2016, i fyny o £843m y flwyddyn gynt.

Mae lle i gredu y gallai ymadawiad Adam Crozier olygu bod ITV yn chwilio am brynwr.

Mae cyfranddaliadau’r darlledwr i lawr o dan 1% yn ystod y prynhawn yn dilyn y newyddion am Adam Crozier.

Ychwanegu Sylw

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.


Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.


Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.


Gofynwn yn garedig i bawb ddarllen canllawiau ‘Cyfrannu i elfennau rhyngweithiol Golwg360’ yn ofalus cyn gadael sylwadau ar y gwasanaeth.


Nodi Camddefnydd
Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.