Mae archfarchnad Morrisons wedi galw cig eidion yn ôl yn dilyn pryderon fod bacteria yn y cynnyrch a allai achosi i gwsmeriaid deimlo effeithiau ffliw.
Mae gofyn i gwsmeriaid sydd wedi prynu darnau cig eidion puprog – ‘Ready to Eat Peppered Beef Slices’ – ddychwelyd yr eitemau yn dilyn rhybudd gan yr Asiantaeth Safonau Bwyd.
Gall sgil effeithiau’r bacteria gynnwys symtomau ffliw, gan gynnwys tymheredd uchel, poen yn y cyhyrau, cyfogi a dolur rhydd.
Mewn achosion mwy difrifol, fe all achosi meningitis.
Ymhlith y rhai sy’n wynebu’r perygl mwyaf mae pobol oedrannus, menywod beichiog, plant mis oed a phobol sydd â chyflwr sy’n taro’u systemau imiwnedd.
Dywedodd Morrisons y byddai cwsmeriaid yn derbyn eu harian yn ôl.
