“Dw i ddim wedi siarad â Lloegr o gwbwl” – Warren Gatland

 

Warren Gatland

Llun: Undeb Rygbi Cymru

Mae Warren Gatland yn mynnu nad yw wedi cael y cynnig i olynu Eddie Jones yn Brif Hyfforddwr Lloegr.

Mae disgwyl i’r gŵr o Seland Newydd adael tîm Cymru ar ôl pencampwriaeth Cwpan Rygbi’r Byd eleni, a hynny wedi 12 mlynedd o fod yn Brif Hyfforddwr y crysau cochion.

Wrth gyhoeddi pwy fydd yn y garfan ar gyfer y bencampwriaeth yn yr hydref, cyfaddefodd Warren Gatland fod rhywrai wedi cysylltu ag ef ynglŷn â’i ddyfodol, ond nad oedd tîm Lloegr yn un o’r rheiny.

“Dw i wedi cael sawl cynnig o wahanol ffynonellau,” meddai Prif Hyfforddwr Cymru. “Mae’n fater o wneud y penderfyniad iawn ar yr amser iawn, felly mae’n rhaid pwyso a mesur.

“I fod yn onest, dw i’n canolbwyntio ar y chwech i’r saith mis nesaf, ar Gymru ac ar Gwpan y Byd.

“Dydw i ddim wedi siarad â Lloegr o gwbwl. Dw i’n meddwl eu bod nhw wedi dweud yn eithaf clir beth maen nhw’n ei wneud o ran cadw unrhyw apwyntiadau neu drafodaethau tan ar ôl Cwpan Rygbi’r Byd.”

Doniau hen a newydd

Ymhlith aelodau’r garfan a gafodd ei chyhoeddi gan Warren Gatland heddiw (dydd Mawrth, Ebrill 30) mae dau chwaraewr newydd, sef yr asgellwr Owen Lane a’r prop Rhys Carre – ill dau o’r Gleision.

Mae’r garfan gyfan yn cynnwys 46 o ddynion – 19 cefnwr a 23 blaenwr – gan gynnwys y 36 a arweiniodd Cymru i fuddugoliaeth yng nghystadleuaeth y Chwe Gwlad eleni.

Hefyd wedi ei gynnwys mae’r wythwr, Taulupe Faletau, sydd wedi bod yn dioddef o anaf yn ystod y rhan fwyaf o’r tymor hwn, yn ogystal â’r cefnwyr, Aaron Shingler a James Davies.

Y ddau sydd ddim wedi eu cynnwys yw Ellis Jenkins a Thomas Young wrth iddyn nhw wella o anafiadau, ond fe allan nhw gael eu hychwanegu yn hwyrach yn yr haf.

Blaenwyr (23)

Leon Brown (Dreigiau), Rhys Carre (Gleision), Rob Evans (Scarlets), Tomas Francis (Exeter Chiefs), Wyn Jones (Scarlets), Samson Lee (Scarlets), Dillon Lewis (Gleision), Nicky Smith (Gweilch), Elliot Dee (Dreigiau), Ryan Elias (Scarlets), Ken Owens (Scarlets), Jake Ball (Scarlets), Adam Beard (Gweilch), Bradley Davies (Gweich), Cory Hill (Dreigiau), Alun Wyn Jones (Gweilch), James Davies (Scarlets), Taulupe Faletau (Caerfaddon), Ross Moriarty (Dregiau), Josh Navidi (Gleision), Aaron Shingler (Scarlets), Justin Tipuric (Gweilch), Aaron Wainwright (Dreigiau).

Cefnwyr (19)

Aled Davies (Gweilch), Gareth Davies (Scarlets), Tomas Williams (Gleision), Gareth Anscombe (Gleision), Dan Biggar (Northampton Saints), Jarrod Evans (Gleision), Rhys Patchell (Scarlets), Jonathan Davies (Scarlets), Hadleigh Parkes (Scarlets), Owen Watkin (Gweilch), Scott Williams (Gweilch), Josh Adams (Caerwrangon), Hallam Amos (Dreigiau), Steff Evans (Scarlets), Leigh Halfpenny (Scarlets), Owen Lane (Gleision), George North (Gweilch), Jonah Holmes (Caerlŷr), Liam Williams (Saracens).

Rygbi

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd