Cyfartal rhwng Cei Connah a’r Seintiau

Diweddarwyd  

Cei Connah 1–1 Y Seintiau Newydd                                            

Gôl yr un a phwynt yr un a oedd hi wrth i Gei Connah groesawu’r Seintiau Newydd i Stadiwn Glannau Dyfrdwy yn y frwydr tua brig y Cymru Premier nos Wener.

Dechreuodd y ddau dîm y noson yn y tri uchaf ac ma’r Nomadiaid yn codi i’r brig ar wahaniaeth goliau wedi i gôl hwyr Mike Wilde achub pwynt iddynt mewn gêm lawn penderfyniadau dadleuol.

Daeth y cyntaf o’r penderfyniadau mawr hynny yn yr hanner cyntaf pan yr arhosodd George Horan ar y cae er gwaethaf taro pen elin yng ngwyneb gwrthwynebydd.

O ran cyfleoedd o flaen gôl cyn yr egwyl, daeth y gorau o’r rheiny i Dean Ebbe yn dilyn symudiad tîm slic ond anelodd ei ergyd yn rhy agos at Lewis Brass yn y gôl.

Di sgôr wrth droi felly ond gwnaeth Ebbe yn iawn am ei gamgymeriad ar yr awr, yn rhwydo yn y cwrt chwech i roi’r ymwelwyr ar y blaen wedi gwaith da Ryan Brobbel ar y chwith.

Gallai Cei Connah yn hawdd fod wedi mynd i lawr i ddeg dyn wedi hynny yn dilyn tacl wyllt gan Jamie Insall ond dihangodd yr eilydd gyda cherdyn melyn yn unig.

Ond parhau a wnaeth noson ddiddorol y dyfarnwr wrth iddo roi cic o’r smotyn i’r Seintiau oherwydd llawiad eithaf amlwg Danny Holmes, cyn newid ei feddwl ar ôl trafod gyda’r dyfarnwyr cynorthwyol!

A’r penderfyniad hwnnw a oedd y trobwynt wrth i Gei Connah unioni pethau ddau funud yn ddiweddarach, Wilde yn rhwydo wedi i Paul Harrison wyro cynnig gwreiddiol Insall i’w lwybr.

Mae’r canlyniad yn cadw’r Seintiau yn drydydd ond yn codi Cei Connah i frig y tabl, dros nos o leiaf. Gall y Barri ddychwelyd i’r safle hwnnw gyda phwynt yng Nghaernarfon brynhawn Sadwrn.

.

Cei Connah

Tîm: Brass, Disney, Horan, Farquharson (Insall 45’), Holmes, Roberts (Dool 58’), Harrison (Bakare 45’), Morris, Poole, Wolfe, Wilde

Gôl: Wilde 82’

Cardiau Melyn: Roberts 9’, Horan 9’, Insall 73’, Bakare 77’, Disney 90+2’

.

Y Seintiau Newydd

Tîm: Harrison, Harrington, Redmond, Marriott, Davies, Nembhard, Routledge, Brobbel, Edwards (Cieslewicz 86’), Mullan, Ebbe (Draper 70’)

Gôl: Ebbe 61’

Cardiau Melyn: Harrison 9’, Brobbel 84’

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd