Caerdydd 0–1 Wolves
Methodd Caerdydd ddwy gic o’r smotyn wrth iddynt golli yn erbyn Wolves mewn diweddglo dramatig yn Stadiwm y Ddinas nos Wener.
Yr ymwelwyr aeth â hi yn y frwydr ar frig y Bencampwriaeth wedi i Gary Madine a Junior Hoilett fethu cic o’r smotyn yr un i’r Adar Gleision yn yr amser a ganiateir am anafiadau ar ddiwedd y gêm!
Wedi hanner cyntaf tynn heb lawer o gyfleoedd clir, fe fywiogodd pethau’n fuan wedi’r egwyl gyda Leo Bonatini’n taro’r postyn o ongl dynn i Wolves.
Daeth unig gôl y gêm i’r ymwelwyr hanner ffordd trwy’r ail hanner pan grymanodd Ruben Neves gic rydd o safon i’r gornel uchaf o bum llath ar hugain.
Cafodd Helder Costa gyfle da i ddiogelu’r tri phwynt bedwar munud o’r diwedd ond anelodd ei ergyd heibio’r postyn wedi rhediad unigol da.
Rhoddodd hynny lygedyn o obaith i Gaerdydd ac fe ddylai’r Adar Gleision fod wedi cipio pwynt o leiaf yn yr amser brifo ar ddiwedd y gêm.
Roedd pedwar munud wedi eu chwarae dros y naw deg pan arbedodd John Ruddy gic o’r smotyn Madine yn dilyn trosedd Conor Coady ar Anthony Pilkington.
Yna, yn y chweched munud ychwanegol fe darodd Hoilett y trawst o ddeuddeg llath wedi trosedd Ivan Cavaleio ar Aron Gunnarsson.
Daw rhediad hir heb golli Caerdydd i ben felly a bydd yn rhaid iddynt gadw golwg dros eu hysgwydd ar Fulham ac Aston Villa os am aros yn yr ail safle dros chwe gêm olaf y tymor.
.
Caerdydd
Tîm: Etheridge, Peltier, Morrison, Bamba, Bennett, Wildschut (Madine 71’), Paterson (Mendez-Laing 51’), Gunnarsson, Bryson, Zohore (Pilkington 84’), Hoilett
Cardiau Melyn: Peltier 62’, Morrison 66’
.
Wolves
Tîm: Ruddy, Bennett, Coady, Boly, Doherty, Saiss, Neves, Douglas, Jota (Cavaleiro 67’), Afobe (N’Diaye 78’), Bonatini (Costa 58’)
Gôl: Neves 67’
Cardiau Melyn: Saiss 75, Costa 89’
.
Torf: 29,317
