Leon Britton wedi’i benodi’n hyfforddwr cynorthwyol Abertawe

 
Elyrch

Mae capten tîm pêl-droed Abertawe, Leon Britton wedi’i benodi’n hyfforddwr cynorthwyol newydd y clwb.

Daw’r penodiad yn dilyn ymadawiad Claude Makelele, sydd wedi’i benodi’n rheolwr ar dîm K.A.S. Eupen yng Ngwlad Belg.

Bydd y chwaraewr canol cae 35 oed yn parhau i chwarae, ond mae’n ildio capteniaeth y clwb.

Bydd e’n ymuno â Paul Clement, Nigel Gibbs, Karl Halabi a Tony Roberts ar staff hyfforddi’r clwb.

‘Perffaith’

Yn ôl Paul Clement, Leon Britton yw’r person perffaith i ymgymryd â’r swydd, ac yntau’n paratoi ar gyfer trwydded hyfforddi A gan Uefa.

Ymunodd e â’r clwb yn 2002, gan chwarae mewn 525 o gemau yn ei ddau gyfnod gyda’r clwb, gan chwarae ym mhob adran yn y Gynghrair Bêl-droed.

Dywedodd Paul Clement: “Dw i wrth fy modd fod Leon wedi cytuno i ymgymryd â rôl chwaraewr-hyfforddwr cynorthwyol.

“Dyma ddechrau pennod newydd yn ei yrfa.

“Dw i’n teimlo mai fe yw’r person perffaith ar gyfer y rôl ar hyn o bryd. Mae e’n sicr yn dal yn rhan o’m cynlluniau fel chwaraewr ond bellach, gallwn ni dynnu ar ei wybodaeth fel hyfforddwr hefyd. Mae ganddo fe dipyn i’w gynnig yn yr ystyr hynny.

“Mae e bellach yn rhan o’r holl gyfarfodydd rheol ac ar ddiwrnodau pan na fydd e’n ymarfer, bydd e’n rhan o’r strwythur hyfforddi.

“Yn yr un modd, ar ddiwrnodau gemau, pe bai e yn y garfan, bydd e’n canolbwyntio ar chwarae. Os na, bydd e yn y cwt fel rhan o’r staff hyfforddi.

“Mae gan Leon berthynas wych gyda’r chwaraewyr ac mae ganddo fe berthynas arbennig gyda chefnogwyr y clwb hwn.

“Mae e’n gwybod yn fwy na neb beth mae chwarae i’r clwb hwn yn ei olygu.”

‘Diolch’

Mae Paul Clement hefyd wedi diolch i Claude Makelele am ei gyfraniad i’r clwb dros gyfnod o ddeng mis.

“Roedd ei wybodaeth, ei brofiad ac yn arbennig y berthynas fagodd e gyda’r chwaraewyr yn bositif iawn, iawn.

“Galla i ddeall ei ddymuniad i ymgymryd â rôl prif hyfforddwr, a dw i’n dymuno’n dda iddo fe yn y cyfnod nesaf yn ei yrfa. Byddwn ni’n dilyn canlyniadau Eupen o Abertawe.”

 

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd