Pwynt i Gymru yn Serbia

Diweddarwyd am  


Mae gobeithion Cymru o gyrraedd Cwpan y Byd yn 2018 yn dal yn fyw ar ôl iddyn nhw gael gêm gyfartal 1-1 yn erbyn Serbia yn ninas Belgrade heno.

Daw’r canlyniad union flwyddyn ar ôl i Gymru guro Slofacia yn eu gêm gyntaf yn Ewro 2016 yn Ffrainc.

Sgoriodd Aaron Ramsey gic o’r smotyn yn null Panenka – dros ben y golwr – ar ôl 35 munud wedi i grys Sam Vokes gael ei dynnu yn y cwrt cosbi.

Ar yr un cae yn 1976 y sgoriodd Antonin Panenka gôl union yr un fath o’r smotyn yn erbyn Gorllewin yr Almaen yn rownd derfynol Pencampwriaethau Ewrop.

Ond fe sicrhaodd Serbia bwynt drwy gôl gan ymosodwr Newcastle, Aleksandar Mitrovic ar ôl 73 o funudau, er y gallen nhw fod wedi mynd ar y blaen yn gynnar yn yr ail hanner pan oedd hi’n edrych fel pe bai Chris Gunter wedi llawio’r bêl yn y cwrt cosbi.

Mae Cymru bellach yn drydydd, bedwar pwynt y tu ôl i Serbia a Gweriniaeth Iwerddon yng Ngrŵp D.

Dyma bumed gêm gyfartal Cymru yn olynol, ac fe fydd rhaid iddyn nhw guro Awstria a Moldofa er mwyn cadw eu gobeithion o gyrraedd Rwsia’n fyw.

Ond fydd Joe Allen ddim ar gael i wynebu Awstria ar ôl cael cerdyn melyn am dacl flêr ar Filip Kostic.

‘Pwynt gwych’

Ar ddiwedd y gêm, dywedodd rheolwr Cymru, Chris Coleman ei fod yn “bwynt gwych” i Gymru.

Dywedodd wrth Sky Sports: “Ry’ch chi’n disgwyl gêm galed pan y’ch chi’n dod yma ond dros y 90 munud, cawson ni’r cyfleoedd gorau ac fe weithiodd y cynllun i’r dim.

“Dy’n ni ddim yn mynd i ddod yma a chwarae pêl-droed agored. Gwnaethon ni hynny o’r blaen ac ry’n ni’n gwybod beth ddigwyddodd [colli o 6-1].”

Gobaith o hyd

Er nad oedd Cymru wedi llwyddo i sicrhau’r triphwynt, mae Chris Coleman yn credu bod ei dîm ynddi o hyd wrth iddyn nhw geisio gorffen yn ail yn y grŵp.

“Mae’n grŵp cyffrous.

“Dw i’n gwybod fod pobol yn edrych ar ein pedwar pwynt gyda phedair gêm i fynd, allwn ni gau’r bwlch? Wrth gwrs. Cant y cant, gallwn ni gau’r bwlch.

“Ry’n ni’n edrych ymlaen at yr heriau sydd i ddod yn yr ymgyrch yma.”

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd