Morgannwg yn herio Caint i geisio buddugoliaeth gynta’r Vitality Blast

Diweddarwyd am  
Pêl griced wen

Fe fydd Morgannwg yn teithio i Gaergaint heno i herio Caint wrth iddyn nhw geisio’u buddugoliaeth gyntaf yng nghystadleuaeth ugain pelawd y Vitality Blast.

Tra bod Ruaidhri Smith yn cael cyfle arall i serennu ar ôl cipio tair wiced yn erbyn Surrey, mae Kiran Carlson, y batiwr o Gaerdydd, allan o hyd ag anaf i’w ochr ond y gobaith yw y bydd e ar gael ar gyfer y gêm yn erbyn Essex nos Wener.

Hon fydd gêm olaf ond un Fakhar Zaman, y batiwr llaw chwith o Bacistan, tra bod disgwyl i Shaun Marsh chwarae yn ei ail gêm i’r sir ers dychwelyd yr wythnos hon.

Gemau’r gorffennol

Tra na chafodd y gêm yn erbyn Caint yng Nghaerdydd y llynedd ei chynnal oherwydd y glaw, Morgannwg oedd yn fuddugol yng Nghaergaint yn 2017, a hynny o 25 o rediadau.

Mae Caint yn gydradd ail yn y tabl, ac yn mynd am le yn rownd yr wyth olaf, tra bod Morgannwg yn dal heb fuddugoliaeth ar waelod y tabl.

Mae Caint wedi ennill chwe gêm hyd yn hyn, ond wedi colli tair allan o’u pedair gêm ddiwethaf.

Mae gan y Saeson dîm cryf, gyda nifer o chwaraewyr rhyngwladol, gan gynnwys Sam Billings a Mohammad Nabi, ynghyd â bowlwyr cyflym fel Adam Milne a Hardus Viljoen, sy’n gallu cyrraedd cyflymdra o 90 milltir yr awr yn gyson.

Angladd Malcolm Nash

Yn y cyfamser, mae manylion angladd Malcolm Nash wedi cael eu cyhoeddi.

Bu farw’r cyn-chwaraewr amryddawn yn 74 oed ar Orffennaf 30.

Bydd y gwasanaeth yn cael ei gynnal yn Eglwys St. James yn ardal yr Uplands yn Abertawe am 1 o’r gloch ar ddydd Mawrth, Awst 27.

Bydd lluniaeth ar ôl y gwasanaeth yn San Helen, lle daeth yn fyd-enwog am gael ei daro am chwech chwech gan Garfield Sobers mewn gêm rhwng Morgannwg a Swydd Nottingham yn 1968 – y tro cyntaf erioed i’r gamp honno gael ei gyflawni.

Carfan Caint: S Billings (capten), D Bell-Drummond, A Blake, M Claydon, J Cox, Z Crawley, F Klaasen, H Kuhn, Mohammad Nabi, M O’Riordan, Imran Qayyum, O Robinson, H Viljoen

Carfan Morgannwg: D Lloyd, Fakhar Zaman, S Marsh, C Ingram (capten), C Cooke, K Carlson, C Taylor, D Douthwaite, G Wagg, R Smith, A Salter, M de Lange, L Carey

Criced

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd