Mae trac rasio ceir newydd yn ne Cymru wedi cael sêl bendith cynllunwyr.
Gallai’r cynllun greu miloedd o swyddi ar y safle 830 erw ger Glyn Ebwy.
Dywed gwrthwynebwyr i’r cynllun bod yna beryglon amgylcheddol wrth godi’r trac.
Ond cafodd y cynllun ganiatâd cynllunio gan Gyngor Blaenau Gwent heddiw.
Bydd Cylched Cymru yn creu hyd at 3,000 o swyddi yn ystod y cyfnod adeiladu, a gallai’r nifer ddyblu ar ôl i’r trac gael ei agor.
Bydd y trac yn cael ei godi ar safle yn Rassau ger Glyn Ebwy, ac mae’n un o’r cynlluniau adeiladu drytaf yn hanes rasio ceir.
Bydd y safle hefyd yn cynnwys trac beiciau a pharc technoleg ar gyfer ymchwil, datblygiad, gwasanaethau cymorth, gwesty a siopau.
Y gobaith yw y gallai’r trac gynnal y MotoGP yn y dyfodol.
Dywedodd llefarydd: “Calon y safle 830 erw fydd cyfleuster rasio ceir o’r radd flaenaf, fydd yn derbyn tystysgrif i gynnal digwyddiadau rasio modur cenedlaethol a rhyngwladol, gyda thrac 3.5 milltir yn manteisio ar dopograffi unigryw Glyn Ebwy.”
Fe fydd academi yn cael ei agor hefyd i helpu i ddatblygu sgiliau gyrwyr y dyfodol.
Mae disgwyl i hyd at 750,000 o bobl ymweld â’r safle bob blwyddyn, ac fe allai gynhyrchu hyd at £50 miliwn ar gyfer economi’r DU.
Ond mae gwrthwynebwyr wedi dweud y gallai’r trac niweidio’r amgylchedd ger Parc Cenedlaethol Bannau Brycheiniog.
Dywedodd Cyfoeth Naturiol Cymru y byddai graddfa’r trac yn “cael effaith amgylcheddol annerbyniol”.
Roedd yna bryderon hefyd am lefelau sŵn a thraffig yn yr ardal leol.
