Mae S4C wedi dechrau hysbysebu am Brif Weithredwr newydd, gan osod dyddiad cau cyn diwedd y mis.
Datgelodd Golwg 360 ddoe bod y sianel wedi penodi cwmni Odgers Berndtson er mwyn goruchwylio’r broses o ddod o hyd i brif weithredwr newydd.
Penodwyd Arwel Ellis Owen i’r swydd dros dro yn dilyn ymadawiad Iona Jones ym mis Gorffennaf, ond heddiw anfonwyd yr hysbysebion cyntaf i’w cynnwys yn y wasg.
Y dyddiad cau ar gyfer ymgeiswyr fydd dydd Gwener, 26 Tachwedd.
Bydd yr hysbyseb yn ymddangos yng nghylchgrawn Golwg, y Guardian, y Daily Post, Western Mail a’r Cymro, ac ar wefan Odgers Berndtson fan hyn.
‘Her’
Mae’r hysbyseb yn galw am brif weithredwr wedi ei leoli yng Nghaerdydd, gyda chyflog “sy’n gymesur â swyddogaeth a phrofiad yr ymgeisydd llwyddiannus”.
“Mae Awdurdod S4C yn chwilio am Brif Weithredwr i arwain y Sianel drwy heriau a chyfleoedd y dyfodol,” meddai’r hysbyseb.
“Bydd yr ymgeisydd llwyddiannus yn meddu ar brofiad gweithredol ar lefel Bwrdd sydd wedi profi’r gallu i arwain cydweithredwyr mewn cyfnod o newid sylfaenol.
“Bydd o/hi hefyd yn dod â phrofiad o gyflwyno newidiadau cymhleth, ymgysylltu â rhanddeiliaid, a gweithredu mewn swydd amlwg trwy gyfrwng y Gymraeg a’r Saesneg.”
Cwrdd â’r BBC
Cadarnhaodd S4C wrth Golwg 360 ddoe y bydden nhw’n cynnal eu cyfarfod cyntaf gyda Syr Michael Lyons, pennaeth Ymddiriedolaeth y BBC, dydd Llun nesaf, 8 Tachwedd.
Dan y drefn newydd fe fydd S4C yn rhan o’r BBC a bydd y gorfforaeth yn gorfod talu rhywfaint o gostau’r sianel allan o’r drwydded deledu.
