Brigyn i gydweithio â Hefin Huws

 


Dau set o frodyr yn cydweithio - Ynyr ac Eurig Robers, a Hefin a Gareth Huws
Mae’r grŵp Brigyn wedi cyhoeddi eu bod yn cydweithio gyda’r  cerddor amryddawn Hefin Huws, ac yn bwriadu gwneud set arbennig ar y cyd yn gig 50 ym mis Gorffennaf.

Cyhoeddwyd y newyddion ar faes Eisteddfod yr Urdd ddoe wrth i Brigyn wneud set acwstig arbennig ar uned Cymdeithas yr Iaith, sy’n trefnu’r ŵyl gerddorol.

Erbyn hyn mae Brigyn, sy’n brosiect y brodyr Ynyr ac Eurig Roberts, wedi hen sefydlu eu hunain fel un o grwpiau mwyaf creadigol y sin Gymraeg.

Mae statws Ynyr fel cyfansoddwr wedi codi ers i’w gân ’Rhywun yn Rhywle’ gipio teitl Cân i Gymru llynedd.

Mae Hefin Huws yn adnabyddus fel un o gyfansoddwyr mwyaf toreithiog y sin dros y tri degawd diwethaf fel artist unigol, ond hefyd fel aelod o’r grwpiau Maffia Mr Huws a Llwybr Cyhoeddus.

Ymysg ei glasuron mae  ‘Twll Triongl’, ‘Chwysu dy hun yn oer’ a ‘Cariad dros Chwant’.

Arwr cerddorol

Mae Brigyn yn edrych ymlaen yn fawr at y cyfle i gydweithio â Hefin yn ôl y prif ganwr.

“Yn fy marn i, Hefin ydi un o’r perfformwyr a’r cyfansoddwyr gorau a mwyaf nodedig yn hanes cerddoriaeth roc a phop Cymraeg” meddai Ynyr Roberts.

“Da ni wedi bod yn canu’r gân ‘Cariad dros Chwant’ fel rhan o’n set ers i ni ffurfio Brigyn a dwi wedi bod yn ffan mawr o Hefin Huws ers o’n i’n blentyn. Mi fydd hi’n hwyl ac yn her cael perfformio efo un o’n arwyr cerddorol i!”

Perfformio cân amlwg am y tro cyntaf

Yn ôl y grŵp, bydd gŵyl Hanner Cant, a gynhelir ym Mhafiliwn Pontrhydfendigaid ar benwythnos 13-14 Gorffennaf, yn un o gigs mwyaf Brigyn hyd yn hyn.

Ac i nodi’r achlysur maent yn addo perfformio un o’u caneuon amlycaf yn fyw am y tro cyntaf.

“Mi fydd hi’n fraint hefyd cael Hefin i ganu ambell un o fy nghaneuon innau hefyd” meddai Ynyr.

“ Da ni hefyd am gymryd mantais o’r sefyllfa i berfformio un o ganeuon amlycaf Brigyn da ni rioed wedi ei pherfformio yn fyw o’r blaen. Cân sydd efo teitl eironig o gysidro y bartneriaeth fydd ar y llwyfan y prynhawn hwnnw ym Mhontrhydfendiagaid.”

Bydd Gareth Huws, sef brawd Hefin a drymiwr Llwybr Cyhoeddus yn chwarae drymiau i’r grŵp yn y gig, gan olygu bydd dau set o frodyr ar y llwyfan.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Gwobrau BAFTA Cymru 2018