“Arbedion sylweddol” wedi eu gwneud yn Eisteddfod yr Urdd Caerdydd a’r Fro

Diweddarwyd  
Eisteddfod yr Urdd Caerdydd a'r Fro

Eisteddfod yr Urdd Caerdydd a’r Fro

Mae yna “arbedion sylweddol” wedi cael eu gwneud er mwyn sicrhau bod Eisteddfod yr Urdd Caerdydd a’r Fro yn un “lwyddiannus a llewyrchus”, meddai prif drefnydd yr ŵyl.

Mae’r mynediad i’r maes, sydd wedi ei leoli yn ardal y bae, yn rhad ac am ddim eleni, a hynny am y tro cyntaf erioed yn hanes Eisteddfod yr Urdd. Yr unig eithriad yw bod oedolion yn gorfod talu er mwyn gwylio’r cystadlu yng Nghanolfan y Mileniwm.

Cafwyd trefniant tebyg gan yr Eisteddfod Genedlaethol pan ymwelodd hi â’r un safle fis Awst y llynedd, ond daeth i’r amlwg yn ddiweddarach fod yr ŵyl honno wedi gwneud colled ariannol o bron i £300,000.

“Cynllunio i beidio â gwneud colled”

Yn ôl Morys Gruffydd, Trefnydd Eisteddfod yr Urdd, dydyn nhw “byth yn cynllunio i wneud colled” ac mae’n gobeithio bod yr “arbedion sylweddol” a wnaed eleni yn sicrhau bod yr ŵyl yn cael ei “hariannu”.

“Mae’r mynediad i’r Maes am ddim, ond mae bandiau braich yn cael eu gwerthu i oedolion er mwyn dod i’r cystadlu, ac mae mwyafrif helaeth o’n hymwelwyr ni yn mynychu oherwydd y cystadlu, felly rydyn ni’n gobeithio adennill rhywfaint o’r incwm y bydden ni’n ei gael drwy’r tocynnau,” meddai wrth golwg360.

“Ond mae yna arbedion yn cael ei wneud hefyd drwy ddefnyddio adeiladau parhaol. Dydyn ni ddim yn gorfod codi cymaint o strwythurau dros dro a dydyn ni yn gorfod rhoi trac-fyrddau i lawr, felly mae yna arbedion sylweddol wedi eu gwneud.

“Rydyn ni wedi trefnu ar gyfer Eisteddfod lwyddiannus a llewyrchus,” meddai wedyn.

Meysydd parhaol – ‘y drafodaeth yn parhau’

Y llynedd, fe ddatgelodd golwg360 fod yr Urdd yn ystyried symud yr Eisteddfod tuag at safleoedd parhaol.

Flwyddyn yn ddiweddarach, mae Morys Gruffydd yn dweud bod y drafodaeth “yn dal i fynd yn ei blaen”, ac nad yw’r mudiad wedi penderfynu pa un ai i gadw’r ŵyl yn un symudol ai peidio.

“Does dim llawer o symud wedi bod, i fod yn hollol onest, felly o ran adran yr Eisteddfod, rydyn ni’n gallu parhau i weithio ar y dybiaeth ein bod ni’n parhau i symud am y dyfodol mor bell ag yr ydyn ni’n gallu rhagweld,” meddai.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn