Jest y Job i Sara Lois Roberts ym Menter Môn

 

Aelod diweddaraf tîm Menter Môn yw Sara Lois Roberts o Lanbedrog, ac ers tair wythnos mae wedi bod yn gweithio fel Cydlynydd Hwb Menter. Ond pwy yw Sara Roberts? Aeth Golwg i’w holi…

Pam penderfynu mynd am y swydd yma?

Roeddwn yn awyddus i wthio fy hun, i geisio am rywbeth fyddai’n sialens. Roedd yn swnio yn ofnadwy o ddiddorol a gan ei bod yn rhaglen newydd a byddai cyfle i mi fod yn rhan o’i siapio o’r cychwyn cyntaf.

Sut ydych chi’n treulio eich amser y tu allan i’r gwaith?

Rwyf yn rhedeg fy musnes fy hun, Sara Lois Jewellery, yn creu gemwaith. Modrwyau dyweddïo a phriodasau yn bennaf dyddiau yma. Mae’r busnes yn fy nghadw i’n ofnadwy o brysur, ond pan mae gen i amser sbâr dwi’n mwynhau treulio amser gyda fy nheulu a ffrindiau neu’n gwylio rhagleni teledu gwael. Hollyoaks ydi fy ‘guilty pleasure’!

Llyfr nodiadau neu sgrîn?

Does dim i guro llyfr nodiadau os oes angan sgwennu rhywbeth i lawr yn sydyn, ond mi wyf yn defnyddio’r ap Asana i nodi lawr a cadw trefn ar y tasgau sydd yn dod allan o’r nodiadau sydyn.

Ffonio neu ebostio?

Ebost yn bendant i mi – dwi’n hoff ei fod yn rhoi mwy o gyfle i chi feddwl be ydych eisiau ei ddweud. Ac mae bob tro yna fel record os oes gennych gof gwael fel sgen i!

Beth yw eich swydd orau hyd yn hyn?

Dwnim os byswn i yn ei alw yn fy swydd orau, ond mae gen i atgofion da o fy swydd gyntaf un mewn siop frechdanau yn Abersoch. Yn ystod yr haf roedd rhaid cychwyn am 6:30 yn y bora er mwyn pobi cannoedd o baguettes ac yna eu torri a’u llenwi efo letys! Roedd rhywbeth eithaf braf am wneud hynny yn nhawelwch y bora.

Beth yw’r Hwb Menter? 

Mae’n darparu’r wybodaeth, yr arweiniad, yr ysbrydoliaeth a’r gofod i entrepreneuriaid drawsnewid eu syniad yn fusnes llwyddiannus. Gall dechrau busnes fod yn brofiad unig gyda llawer o heriau ar hyd y ffordd. Y gobaith yw creu cymuned o unigolion sydd yn yr un sefyllfa a fydd yn rhannu syniadau â’i gilydd a chynnig anogaeth. Byddwn hefyd yn ceisio darparu ystod o weithgareddau fel siaradwyr gwadd, hackathons, digwyddiadau pitsio a gweithdai rhyngweithiol. A’r peth gorau yw, mae hyn i gyd AM DDIM am o leiaf 6 mis!

Oes gyda chi unrhyw gyngor i bobl sy’n awyddus i fentro?

Cerwch amdani! Does dim rhaid i chi fynd amdani mewn modd eithafol os nad ydych eisiau.  Byswn yn cynghori bod modd profi’r dyfroedd gyntaf, gwneud camau bychain, cadarn i brofi os oes galw am eich busnes. Y peth pwysig ydi eich bod yn cymryd y camau gyntaf yma i gael eich syniad allan yna, i gael adborth a datblygu. Hefyd, peidiwch â bod ofn gofyn am gymorth, mae digonedd ar gael. Beth am gysylltu â’r Hwb Menter fel cam cyntaf?

Cafodd y swydd hon ei hysbysebu ar golwg360.

Penodiadau

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

Straeon poblogaidd