Mae Prif Weinidog Canada, Justin Trudeau, wedi datgan y bydd canabis yn gyfreithlon ledled y wlad o Hydref 17 ymlaen.
Nod y cam yw amddiffyn ieuenctid Canada, a rhwystro troseddwyr rhag medru elwa’n ariannol o werthu’r cyffur, meddai’r arweinydd.
Hon yw’r ail wlad i gyfreithloni canabis a chaniatáu masnach o’r deunydd, tros y wlad oll – Wrwgwái oedd y cyntaf i wneud hynny.
Ond, mi fydd y drefn ychydig yn wahanol yng Nghanada, gan fod pob un o’i thaleithiau yn gyfrifol am bennu rheolau eu hunain tros werthiant canabis.
Tyfu yn y tŷ
Mae ‘na ansicrwydd tros ambell fater o hyd, gan gynnwys y rheolau ynghylch tyfu canabis yn y cartref.
Mae taleithiau Quebec a Manitoba, eisoes wedi penderfynu y byddan nhw’n gwahardd pobol rhag tyfu’r cyffur yn eu cartrefi, er bod llywodraeth y wlad am ganiatáu hynny.
