Bydd y gyfres deledu boblogaidd Spitting Image yn dychwelyd i’r sgrîn fach – gyda Boris Johnson, Yr Arlywydd Trump… a Beyonce ymhlith y cymeriadau newydd.

Bydd y gyfres newydd yn cael ei darlledu fis Hydref ar wasanaeth BritBox, gwasanaeth ffrydio newydd y BBC ac ITV.

Dyma fydd y gyfres wreiddiol gyntaf i gael ei chomisiynu gan BritBox.

Yn ei anterth, roedd pypedau Margaret Thatcher, Ronald Regan ac wrth gwrs, John Major fel y pyped llwyd yn denu 15 miliwn o wylwyr.

Bydd cyd-grewr y rhaglen, Roger Law, a oedd yn gyfrifol am 18 o gyfresi rhwng 1984 a 1996 yn dychwelyd i gynhyrchu’r gyfres newydd.

‘Rhaglen y bobol’

“Rhaglen y bobol fydd hi!” meddai Roger Law.

“Byddwn yn cymryd rheolaeth yn ôl gan rai fel BoJo, Trump, Harry a Meghan, Elon Musk a Kim Kardashian.

“Byddwn yn cael ein syfrdanu gan Jurgen Klopp a Beyonce, ac yn cael diweddariadau tywydd rheolaidd gan ein gohebydd crwydrol Greta Thunberg.

“Mae’r amseru’n iawn, mae’r pypedau’n barod, mae’r bobl wedi siarad.”

“Rydyn ni wrth ein boddau y gall BritBox roi cyfle i greadigrwydd Prydain redeg yn wyllt go iawn,” meddai Kevin Lygo, pennaeth creadigol BritBox Originals a’r cyfarwyddwr teledu gydag ITV.

“Rydyn ni’n edrych ymlaen at ddenu tanysgrifwyr newydd i’r gwasanaeth newydd.”