“Dw i’n teimlo’n Albanaidd iawn” medd Donald Tusk

Diweddarwyd am  

Donald Tusk

Llun Platforma Obywatelska RP CC 2.0 trwy Commons Wikimedia

Byddai croeso i’r Alban annibynnol ymuno â’r Undeb Ewropeaidd, yn ôl Donald Tusk, cyn-lywydd Cyngor Ewrop, sy’n rhybuddio na fyddai’r broses yn un hawdd.

Mae’n dweud y byddai’r Alban yn cael croeso “brwdfrydig”, a’i fod e’n teimlo’n “Albanaidd iawn” yn dilyn ymadawiad Prydain o’r Undeb Ewropeaidd.

Mae’r Alban wedi bod yn mynnu ers tro na ddylai gael ei thynnu allan o’r Undeb Ewropeaidd yn groes i ddymuniad y rhan fwyaf o Albanwyr.

Daw sylwadau Donald Tusk ar raglen Andrew Marr ar y BBC ddiwrnodau’n unig ar ôl i Ska Keller, yr Aelod Seneddol Ewropeaidd o’r Almaen, rybuddio mai “twpdra” fyddai atal Alban annibynnol rhag dychwelyd i’r Undeb Ewropeaidd.

Mae pôl gan YouGov yn awgrymu bod 51% o Albanwyr bellach o blaid annibyniaeth, y tro cyntaf i’r ochr ‘Ie’ ennill mwyafrif ers y refferendwm aflwyddiannus yn 2014.

Serch hynny, dydy’r rhan fwyaf o Albanwyr ddim am weld ail refferendwm cyn 2022, er y bydden nhw’n ei groesawu yn ystod y pum mlynedd nesaf.

Parchu ‘sofraniaeth’

Er bod Donald Tusk yn dweud ers tro na fyddai’n gwneud sylw am yr Alban gan ei fod e’n “parchu sofraniaeth” y Deyrnas Unedig, mae’n ymddangos ei fod e bellach yn fwy parod i wneud sylwadau cyhoeddus.

“Dw i eisiau fy atal fy hun rhag dweud rhywbeth yn rhy blwmp ac yn blaen,” meddai.

“Ond weithiau dw i’n teimlo fel Albanwr – dw i’n teimlo’n Albanaidd, yn enwedig ar ôl Brexit.

“Ond ar yr un pryd, dw i’n gwybod pa mor bwysig yw’r gair sofraniaeth a gonestrwydd oedd sail y ddadl fewnol yn y Deyrnas Unedig.

“Dw i’n teimlo nad fy rôl i yw ymyrryd.”

‘Brwdfrydedd’

Yn ôl Donald Tusk, mae’n disgwyl i Frwsel ymateb yn “frwdfrydig” pe bai’r Alban annibynnol am ddychwelyd i’r Undeb Ewropeaidd.

“Yn emosiynol, does gen i ddim amheuaeth y bydd pawb yn frwdfrydig yma ym Mrwsel, ac yn fwy cyffredinol yn Ewrop,” meddai.

“Os ydych chi’n gofyn i fi am ein hemosiynau, fe fyddwch chi bob amser yn dyst i empathi, dw i’n meddwl.”

Er y croeso cynnes i’r Alban, mae’n pwysleisio bod yna broses i’w dilyn pe bai’r Alban annibynnol eisiau ymuno â’r Undeb Ewropeaidd eto yn y dyfodol.

“Pe bai rhywbeth fel annibyniaeth i’r Alban yn digwydd, er enghraifft, yna bydd angen proses gyson arnom ni.

“Proses newydd fyddai honno.”

… ond nid pawb sy’n cytuno

Yn y cyfamser, mae Dominic Raab, Ysgrifennydd Tramor San Steffan, yn rhybuddio na fydd pawb yn awyddus i groesawu’r Alban annibynnol i’r Undeb Ewropeaidd.

“O ystyried y tueddiadau i ymwahanu yn Sbaen, Ffrainc a’r Eidal, dw i ddim yn sicr y byddai arweinwyr Ewropeaidd, heb sôn am yma yn y Deyrnas Unedig, yn croesawu’r math yma o iaith,” meddai.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn