Mae cefnogwyr Tommy Robinson yn cynnal rali yn Llundain heddiw yn galw am iddo gael gadael y carchar.
Mae ei wrthwynebwyr hefyd yn cynnal rali o dan faner Sefyll Lan i Hiliaeth.
Mae cryn bresenoldeb gan yr heddlu ar hyd llwybrau’r orymdaith, lle bu rhywfaint o wrthdaro â’r protestwyr.
Cyn y digwyddiad, roedd yr heddlu’n rhybuddio y bydden nhw’n arestio unrhyw un oedd yn gwrthod cydymffurfio â’r gyfraith.
Cefndir
Cafodd Tommy Robinson – neu Stephen Yaxley-Lennon, a rhoi ei enw go iawn iddo – ei ddedfrydu i naw mis o garchar yn yr Old Bailey fis diwethaf, ar ôl cael ei ganfod yn euog o ddirmyg llys.
Ond fe fydd e ond yn treulio naw wythnos a hanner dan glo.
Fe wnaeth e ffilmio dynion y tu allan i Lys y Goron Leeds fis Mai’r llynedd, wrth iddyn nhw wynebu cyhuddiadau o ecsbloetio merched ifainc yn rhywiol, ac fe bostiodd e’r deunydd ar Facebook.
Mae protestwyr yn ei gyhuddo o geisio hollti’r gymdeithas.