Mae un o weinidogion San Steffan yn galw am ddileu’r ddedfryd o chwe mis o garchar am y rhan fwyaf o droseddau er mwyn lleihau’r pwysau ar garchardai.
Gallai hyd at 30,000 o droseddwyr osgoi carchar fel rhan o gynlluniau Rory Stewart, y Gweinidog Carchardai. Mae’r rhain yn cynnwys lladron tai a siopau.
Ond fyddai’r cynlluniau ddim yn cynnwys troseddwyr rhyw neu’r rhai sy’n euog o ymosodiadau difrifol, meddai’r Daily Telegraph.
Dywed Rory Stewart mai ei fwriad yw sicrhau bod dedfrydau’n “ddigon hir i’ch niweidio, ond ddim yn ddigon hir i’ch gwella chi’n llwyr”.
Dywed y byddai’r gymuned yn fwy diogel o roi “dedfryd gymunedol” i rai troseddwyr, ac y byddai’n lleihau’r pwysau ar garchardai.
Mae Peter Dawson, cyfarwyddwr Ymddiriedolaeth Diwygio’r Carchardai, yn croesawu’r cynlluniau.
Cefndir
Mae nifer y carcharorion wedi dyblu o 40,000 i 80,000 ers dechrau’r 1990au, yn ôl ystadegau swyddogol.
Cafodd mwy na hanner yr 86,275 o garcharorion yn 2017 ddedfryd o hyd at chwe mis.
Yn ôl ymchwil sydd wedi’i ddyfynnu gan Rory Stewart, mae troseddwyr sy’n derbyn dedfrydau byrion yn fwy tebygol o droseddu eto na’r rhai sy’n derbyn dedfrydau cymunedol.
Ac mae ymchwil yn dangos bod cyflwyno cynlluniau tebyg yn yr Alban wedi lleihau nifer y troseddau’n sylweddol. Y bwriad bellach yw ymestyn y cynllun i ddedfrydau o hyd at flwyddyn.
Dywed llefarydd ar ran y Weinyddiaeth Gyfiawnder nad oes yna “unrhyw gasgliadau ar hyn o bryd”, a bod y gwaith ymchwil yn mynd rhagddo.