Addysg ddim yn paratoi pobol ifanc at fyd gwaith, yn ôl adroddiad

Mae hanner pobol ifanc gwledydd Prydain yn teimlo nad yw addysg yn eu paratoi ar gyfer byd gwaith, ac maen nhw’n teimlo nad ydyn nhw’n cael digon o brofiad gwaith cyn gadael yr ysgol.

Dyma sy’n cael ei nodi mewn adroddiad newydd gan Ffederasiwn Diwydiant Prydain, wedi iddyn nhw holi dros 1,000 o bobol rhwng 17 a 23 am eu profiadau o fyd addysg.

Maen nhw’n credu’n gryf bod cysylltiad rhwng profiadau disgyblion a busnesau – boed drwy brofiad gwaith neu dripiau ysgol – yn ei gwneud hi’n fwy tebygol bod unigolion yn teimlo’n barod at fyd gwaith.

“Rhaid i fusnesau chwarae rhan”

“Mae symudedd cymdeithasol yn stond yn y wlad yma sy’n her i’r Senedd, busnesau a’r gymdeithas ehangach,” meddai John Allan, llywydd Ffederasiwn Diwydiant Prydain.

“Mae’n frawychus i ganfod bod o gwmpas hanner o bobol ifanc yn teimlo nad yw eu haddysg wedi eu paratoi ar gyfer byd gwaith.”

“Mae athrawon, ysgolion a cholegau yn haeddu gwell cefnogaeth ac mae’n rhaid i fusnesau chwarae rhan.”