Cadeirydd Sports Direct am gamu o’r neilltu

 

Un o siopau Sports Direct

Llun o Gomin Wicimedia

Mae cadeirydd cwmni chwaraeon Sports Direct, sydd wedi cael ei feirniadu droeon am fod yn ‘wrth-Gymraeg’, wedi cyhoeddi ei fod yn camu o’r neilltu.

Mae Keith Hellawell wedi bod yn ei swydd ers naw mlynedd ond fe fydd yn ymddeol heddiw yn dilyn cyfarfod blynyddol y cwmni, ac yn cael ei olynu gan y cyfarwyddwr anweithredol David Daly.

Mae prif weithredwr y cwmni, Mike Ashley wedi diolch i Keith Hellawell am ei “gyfraniad arwyddocaol” dros y blynyddoedd.

Ac yntau’n gyn-brif gwnstabl Heddlu Gorllewin Swydd Efrog ac yn gyn-tsar cyffuriau llywodraeth Prydain, mae Keith Hellawell wedi cael ei feirniadu hefyd am amodau gwaith y gweithwyr yn warws y cwmni.

Mae wedi’i feirniadu ymhellach am lywodraethiant y cwmni. Y llynedd, pleidleisiodd 47% o fuddsoddwyr yn ei erbyn wrth iddo geisio blwyddyn arall wrth y llyw.

Mae Uno’r Undeb wedi croesawu ei ymadawiad, gan ddweud ei bod yn “hen bryd” iddo roi’r gorau iddi. Daw’r sylwadau ar ôl i ymgynghorwyr gynghori rhanddeiliaid i bleidleisio yn ei erbyn, gan ddadlau iddyn nhw golli hyder ynddo.

Simon Bentley

Fe fydd yr uwch gyfarwyddwr Simon Bentley hefyd yn ymddeol ar ôl 11 o flynyddoedd yn ei rôl.

Daw’r newyddion am y ddau wrth i Sports Direct ddarogan y byddan nhw’n cyrraedd eu rhagolygon ar gyfer y flwyddyn.

Mae disgwyl i’r cwmni dyfu 5-15%, ond dydy hynny ddim yn cynnwys y ffigwr o £90 miliwn am brynu House of Fraser.

Mae cyfrannau’r cwmni wedi codi 3.7% fore heddiw i 353.6c, ddiwrnod ar ôl iddyn nhw ostwng yn sgil achos yn yr Uchel Lys.

Ddydd Mawrth, cafodd y cwmni orchymyn i gyhoeddi nifer o adroddiadau mewn perthynas ag ymchwiliad ariannol i drafodion cwmni Grant Thornton. Mae Sports Direct yn bwriadu apelio yn erbyn y dyfarniad.

Erthyglau perthnasol

Sylwadau

Nid yw Golwg360 yn gyfrifol am y sylwadau isod nac o angenrheidrwydd yn cytuno â nhw.

Rheolau Cyfrannu | Nodi Camddefnydd

Rheolau Cyfrannu

Gofynnwn yn garedig i ddarllenwyr wneud defnydd doeth o’r gwasanaeth sylwadau – ni ddylid ymosod ar unigolion na chynnwys unrhyw sylwadau a all fod yn enllibus. Meddyliwch cyn teipio os gwelwch yn dda.

Er mwyn cael trafodaeth dda, gofynnwn i chi ddefnyddio eich enw go iawn a pheidio â chuddio y tu ôl i ffugenwau.

Gofynwn yn garedig i bawb ddarllen canllawiau Cyfrannu i elfennau rhyngweithiol Golwg360 yn ofalus cyn gadael sylwadau ar y gwasanaeth.

Iawn

Nodi Camddefnydd

Os ydych chi’n credu bod y neges yma’n torri rheolau’r wefan, cliciwch ar y faner nodi camddefnydd sy’n ymddangos wrth sgrolio dros unrhyw sylwad. Os bydd tri pherson yn anhapus, bydd y neges yn dod yn ôl at Golwg360 i’w ddilysu.

Iawn

1988-2018 Cylchgrawn Golwg yn 30 oed