Mae cyngor wedi dweud y byddan nhw’n bwrw mlaen gyda’u cynlluniau i orfodi nifer o deithwyr i adael eu cartrefi yn ne Lloegr ar ol iddyn nhw fethu a dod i gytundeb.
Mae’n debyg bod tua 200 o deithwyr, ynghyd a nifer o gefnogwyr, wedi cloi eu hunain i mewn i Dale Farm, yn Basildon, Essex wrth i feiliaid baratoi i glirio’r safle ar hen iard sborion.
Mae’r teithwyr wedi colli dadl gyfreithiol sydd wedi para degawd i ddatblygu’r safle.
Dywedodd arweinydd cyngor Basildon Tony Ball y byddai’r beiliaid yn cyrraedd y safle yn ddiweddarach er mwyn symud y teithwyr. Dywedodd y gallai gymryd hyd at wyth wythnos i’w symud.
Dywedodd ei fod yn siomedig iawn nad oeddan nhw wedi llwyddo i ddod i gytundeb. Ond fe roddodd sicrhad y byddai popeth yn cael ei wneud i sicrhau bod y teithwyr yn cael eu symud mewn modd diogel a phroffesiynol.
Trafodaethau
Roedd y cyngor wedi gohirio eu cynlluniau i’w symud bore ma ar ol i’r preswylwyr ofyn am gynnal trafodaethau.
Ond death y trafodaethau i ben ar ol i’r cyngor gael ar ddeall bod y teithwyr yn ceisio gohirio symud o’r safle tan fis Tachwedd pan fydd cais cynllunio ynglyn a safle gerllaw yn cael ei drafod.
Dywedodd Mr Ball bod y mater yn ymwneud â thorri’r gyfraith a “thegwch i bawb” a bod yn “rhaid gwneud cais cynllunio fel pawb arall.”
Roedd y teithwyr yn Dale Farm wedi ymateb yn ddig i honiadau mai dim ond protestwyr oedd ar ol ar y safle. Dywed Cyngor Basildon eu bod wedi cynnig llety i’r teuluoedd sydd yn cael eu gorfodi i symud.