Mae canghellor yr wrthblaid, John McDonnell wedi galw am ddatrys helynt gwrth-Semitiaeth Llafur mor gyflym â phosib.
Mae camau disgyblu’n cael eu cymryd yn erbyn Aelod Seneddol y blaid oedd wedi cyhuddo Jeremy Corbyn o hiliaeth a gwrth-Semitiaeth.
Mae John McDonnell wedi cyhuddo Margaret Hodge o “gamddeall yn llwyr” god ymddygiad y blaid ar wrth-Semitiaeth yn dilyn beirniadaeth gan y gymuned Iddewig.
Ond mae Margaret Hodge yn gwadu iddi regi yn ystod ffrae danllyd ag arweinydd y blaid, Jeremy Corbyn yr wythnos ddiwethaf.
Mae hi’n wynebu camau tros gyhuddiadau o “ymddwyn yn ymosodol”.
“Roedd Jeremy wedi’i ypsetio’n fawr oherwydd, pan fo gyda chi rywun yn lladd arnoch chi yn y modd yma, wrth gwrs ei fod yn eich ypsetio,” meddai John McDonnell.
Dywed fod Margaret Hodge wedi “camddeall” y cod ymddygiad, a bod modd “datrys hyn mewn modd cyfeillgar a symud ymlaen”.
Pleidlais
Cytunodd Aelodau Seneddol Llafur ddydd Llun y byddan nhw’n cynnal pleidlais ym mis Medi i benderfynu a fyddan nhw’n mabwysiadu’r cod ymddygiad newydd.
Ond mae rhai o’r farn ei fod yn hepgor nifer o ganllawiau sy’n cael eu hawgrymu gan Iddewon.
Ategodd John McDonnell neges y Blaid Lafur eu bod nhw’n gwrthwynebu unrhyw sarhad yn erbyn Iddewon.